825/2023-2024
Aizawl 16th June 2023: Vawiin chawhnu khan Mizoram sawrkar aiawha Manipur raltlante chungchang Central sorkar sawipui tura ruat Tourism Minister Pu Robert Romawia Royte chuan Union Home Secretary Ajay Kumar Bhalla chu a pisaah kawmin Manipur atang a Mizorama raltlante chungchang leh thu pawimawh dang a sawipui.
Tourism Minister hian May ni 3, 2023-a Manipura buaina a chhuah atanga vawiin ni thlenga Mizoram Sawrkar hmalak dan, Mizoram Chief Minister Pu Zoramthanga'n Union Home Minister leh Manipur Chief Minister-te phone-a a biak nghal dante, India Prime Minister leh Union Home Minister lehkha a thawn dante hrilhin tun dinhmunah Manipur raltlan mi 11328 Mizorama an awm mek thute leh heng raltlante hi naupang, hmeichhia leh pitar putar chauh an nih tlangpui thu leh mipa thalaite chu an in leh lo veng tura Manipur lamah an awm nia a hriat thute a hrilh a. Nimin thlenga thil thleng khan Manipur tualchhung buaina in ziaawm lam a pan thei lo tih a tichiang a, Central sawrkar chu a tul anga a inrawlh zel a tul tak meuh a ni, a ti. Mizoram sawrkar, NGO leh Kohhrante chuan Manipur buaina avanga raltlante chu theih ang angin an enkawl a, Central sawrkar puihna an mamawh hle tih a hrilh. Minister chuan Mizoram sawrkarin raltlante enkawl nan Home Ministry-ah sum sanction rawtna a thlen te chu rang taka sanction turin Home Secretary hi a ngen a, sanction vat a nih loh chuan thil thalo zawk thleng thei a nih thute a hrilh bawk. Union Home Secretary chuan Mizoram Chief Minister rawtna a lo hriat tawh thu sawiin, Manipur atang a an sahimna zawnga Mizorama raltlante tanpui nan Mizoram sawrkarah sum pek thuai a nih tur thu Tourism Minister hi a lo hrilh a ni.
Pu Robert Romawia Royte Sports Minister ni bawk chuan A.R Lammual chu Assam Rifles ten a rang thei ang bera Mizoram sawrkar kuta an hlan a tul tih sawiin, A.R Lammual hmuna Laldenga Centre lungphum chu Union Home Minister-in a lo phum tawh angin, a taka hna tan vat a ngai tiin NOC pechhuak nghal turin a ngen a, Union Secretary chuan tihfel thuai an tum thu a lo hrilh bawk.
Tourism Minister hi Pu H.Lalengmawia, IAS, Home Commissioner-in a tawiawm a ni.
