824/2023-2024

Hnahthial the 16th June, 2023 - Samagra Shiksha Hnahthial buatsaihin vawiin khan Electric Veng Community Hall Hnahthial-ah Quality Education chungchang leh Zirlaite hmalam hun atana hriat tur tul pawimawh inzirtirna bakah HSLC leh HSSLC pass tharte lawmpuina hun hman niin bialtu MLA leh H&TE Minister ni bawk Dr.R.Lalthangliana chuan Khuallian niin a hmanpui a, District Bawrhsap Pu R.Lalremsanga chu Khualzahawm a ni a, Pu Lalhruaitluanga ZoCareers leh Nl.Helen Lalrinkimi BHSS Serkawn te chu resource person atan hman an ni.

Khuallian Higher & Technical Education Minister Dr.R.Lalthangliana chuan Kum zabi 21-na hi Mizo thalaite tan chona-ah ngaih a tul thu sawiin "A pangngai, pass satliah tan hna hmuh a harin awmzia a awm lo, thiamna tak tak neih a ngai. Zirtirtute pawhin an zirlaite-ah chhawr tlak thiamna an pe thei tih an inhriat thar ka duhin chutiang tura an inbuatsaih pawh ka beisei a ni" tiin Zoram Medical College-a Department hrang hranga hna an lak dawnin Mizo Nula leh tlangval zinga qualify an vang thin hle tih a sawi a, hnamdang sawm a ngaih chang a awm thu a sawi bawk. Super Specialist Doctor pawh Mizo nula tlangval zingah kut zungtang thliah tham lek an awm thu Health Minister ni bawk Dr.R. Lalthangliana chuan sawiin Pilot pawh Mizo zingah 5 an awm tlin loh thu a sawi bakah All India Service lamah pawh sawi tur an van tak thu sawiin "kan rualpawl dan hi kan inenfiah a ngai a ni" tiin Khawvel inher danglam chak takah Mizoram chhung chauh ngaihtuah lova dak chhuak zel turin Zirlaite a fuih a, hlawtling tur chuan daih rei leh peih rei a ngaih thu a sawi bawk a ni.

Khualzahawm District bawrhsap Pu R.Lalremsanga pawhin tuna Hnahthial zirlaite chu Hnahthial hmalam hun an nih thu a sawi bakah Hnahthial chu District thar a nih angin District in a ken tel hmasawnna tam tak kalpui a nih thu leh mipui ten a dawhthleng an dawh thiam a tul thu a sawi a, kumin kum tawp lamah a vawi khat nan Hnahthial District chuan MLA inthlan a hmachhawn dawn thu leh chumi atan chuan inbuatsaihna pawh kalpui mek a nih thu a sawi a, ECI duh danin vote nei thei tur chin chu Electoral roll a inthun ngai pawimawh turin a chah a, Ni 1.10.2023 kum 18 tling te chu vote nei thei tura inziahluhna hun hawn a ni dawn tih a sawi bawk a ni.

He hunah hian Pu Micky R.Lalenkawla DEO/DPC Hnahthial pawhin thu a sawi bakah Rev.V.Lalzarliana chuan Pathian hnenah inhlanna hunserh a hmang a, Hnahthial Centre atanga HSLC leh HSSLC pass tharte hnenah lawmpuina thuziak leh JF.Laldailova Dictionary hlan theuh an ni a, Govt Hnahthial College hnenah tun hnaia Award an dawn lawmpuina thuziak hlan a ni bawk.