823/2023-2024

Aizawl, the 16th June 2023: Vawiin khan Prof Dibakar Chandra Deka, Vice Chancellor leh Prof Lalnundanga, Registrar, Mizoram University(MZU) te chuan Raj Bhavan-ah Governor Dr Hari Babu Kambhampati an hmu.

He hunah hian tunhnaia MZU in NIRF Rankings thar berah University tha 500 Chuang inel zingah nikuma an dinhmun, 78-na atangin 76-naah hma an sawn tih an hrilh a. MZU tihchangtlun dan tur chungchang te sawipuiin Medical College leh Law zirna siam a theih dan kawng te an sawipui a ni.

Governor leh MZU hotute inkawmnaah hian MZU hnuaiah Medical College leh Law Faculty siam a theih dan kawng te leh rawtna lo awmsa thar thawh theih te ngun taka sawiho a ni a. Governor chuan MZU hotute rawtna te chu tha a tih thu sawiin hemi chungchang hi Chief Minister sawipui se tha a tih thu a sawi a. Health Minister leh Law Minister te nen pawh inrawnna nei se tha a tih thu a sawi bawk a ni.

MZU hotute nena inkawmnaah hian Governor chuan Mizoramah mipuiin central Sawrkar hnuaia scheme tha tak tak te leh Bank loan hman tangkai chungchangte kan la hre chiang lo chu a vei thu a sawi a. Bank lam hotute chu vawi tam tak meeting a neih pui tawh thu leh Bank lam chuan tanpui tlak, tanpui mamawh leh loan rul thei tur chu pui an inhuam tih a sawi a. Central welfare scheme hrang hrang te, life insurance scheme hrang hrang te Kan hre tawk lo leh a hlawkna kan tel thin lo chu pawi a tih thu a sawi a ni. Hemi kawngah hian Mipui zirtirna chungchangah emaw Bank ho in statistics an mamawh atana Market survey chungchangah te MZU zirlai leh Research scholar te hman tangkai a rawt a ni.