4114/2023-2024

Dated Aizawl, the 11th March 2024: Vawiin chawhma khan ni thum awh tur, ‘Tourism Awareness Programme (T.A.P) For Training of Tourist Service Providers in Mizoram’ chu Chaltlang Tourist Lodge, Conference Hall-ah Tourism Minister, Pi Lalrinpuii chuan khuallian niin a hawng.

Khuallian, Pi Lalrinpuii chuan Tourism hi kan ram sum dehchhuahna pawimawh tak anih thu sawiin, hmasawnna awm theihna hrang hrangte a tarlang a. Mipui tel tamna, Community based Tourism a pawimawh thu a tarlang tel bawk. Tourism tih hian state dang leh ram dang (foreign) atanga rawn kal mai bakah, Local tourism a huam tel thu sawiin, tih hmasawn a tul thu a sawi a. Department chu facilitator chauh an nih thu sawiin stakeholder-te an pawimawh thu a sawi bawk. Kan ram tourism hmasawnna atana pawimawh tak pakhat chu marketing anih thu sawiin, website leh social media lam hman tangkai a pawimawh thu a tarlang. Mizoram Tourism hi mi zawng zawng, thingtlang mi te tan pawh a tel theihna tur, huapzo tourism-a siam theih a beisei thu a sawi. Minister chuan hemi tih hlawhtlinna tur atan hian hmun (accommodation) tha leh man man si te, eitur thianghlim leh tuihnai, Mizo eitur ngei (local food) tih hluar te leh mi dawnsawn thiam (hospitality) te a pawimawh thu a tarlang tel bawk a ni.

Mizoram sorkar chuan Allocation of Business a tih chhuah ah, Tourist Service Providers-te: Travel Agents, Tour Operators, Accommodation Units, Catering Units leh Restaurants, Spa leh Resort te chu Tourism Department hnuaiah dahin, Tourism Department guidelines, Mizoram Registration of Tourist Trade Act-2020 chu a duang a ni. Hemi hnuaiah hian Tourist Service Providers-te hi in register vek tura duan niin, vawiin ni thlenga an in register tawh dan chu:

Hotel – 60
Homestay – 97
Guesthouse/inns/lodge/motels etc – 20
Travel Agents -35
Tour Operators – 11
Catering units- 29
Restaurants – 700+

Registration drive hi kalpui zel turin hmalak mek a ni.

Tourism Awareness Programme (T.A.P) hawnna (kick-off programme) ah hian Pi R.Lalrodingi, Director, Tourism Department chu Chairperson niin thusawi tawi a neih hnuah Pi C. Ramsangzuali, Tourist Officer chuan hemi hun chhim zawng zawng te ‘Responsible Travel Pledge’ neih puiin, Pu V.Lalengmawia, Additional Secretary, Tourism Department chuan ‘Powerpoint presentation on Mizoram Tourism’ a neih hnuah Chairperson chuan lawmthu sawina tawi neiin a hawnna programme a khar a ni.

He hawnna programme hi Mizoram University(MZU), Tourism&Hospitality Management department-te, Mizoram Restaurant Owners Association-te, Mizoram Hotel Owners Association (MHOA)-te, Mizoram chhunga Homestay leh Guesthouse, Inns, Lodge neitute, Travel Agents Association of Mizoram (TAAM)-te, All Tour Operators of Mizoram(ATOM)-te leh Mizoram Tour Guide Association (MTGA)-ten an chhim a ni.

‘Tourism Awareness Programme (T.A.P) For Training of Tourist Service Providers in Mizoram’ hi ni thum neih tur niin, hetiang hian training neih dan tur chu ruahman a ni.

Day-1 (11th March 2024): Training for Restaurant Owners
Day-2( 12th March 2024): Training for Accomodation Units(Hotel/Homestay/Inn/Lodge/Guesthouse/B&B etc.)
Day-3 (13th March 2024) : Training for Travel Agents, Tour Operators&Tour Guides