Vawiin khan Tourism Minister Pu Robert Romawia Royte chuan Bung Bangla a Institute of Hotel Management Building a tlawh.

Ministry of Tourism, Government of India atanga hmuh Rs 10 crore senga sak Institute of Hotel Management, Bung Bangalow, Aizawl hi kum 2009 atang khan sak a ni a. Kum 2013 khan sak zawh tawh ni mahse tunah hian a nihna tur anga kalpui ala ni lova, Tourism Minister Pu Robert Romawia chuan hei hi sawrkar thar in a ngaihpawimawh thu leh a nihna ang taka hman thuai sawrkar in a tum thu a sawi a ni.

Tourism Minister Pu Robert Romawia Royte chuan  Institute of Hotel Management hi sawrkar laipui hnuaia awm tur ni mahse Mizoram sawrkar in thuneihna a nei dawn a ni a ti a. Institute of Hotel Management hi a taka kalpui anih chuan Hotel Management map ah Mizoram a lang ve tawh dawn a, Mizo thalai ten kan ram chhung ngei ah Hotel Management leh Tourism lam an zir thei dawn ani a ti.

Institute of Hotel Management Building a tlawh hnu hian Tourism Minister chuan Chaltlang a Tourist Lodge tlawh nghalin Tourist Lodge zauhna tur hna kal mek te a hmunah a en a,  hmalak zui zel na a tangkai leh pawimawh te  Principal Secretary Finance Pu Lalnunmawia Chuango a sawipui nghal bawk a ni.

Vawiin vek khan Pu Robert Romawia Royte chuan a department chan pakhat Sports & Youth Services Department hmalakna thar  tur Zemabawk field-a stadium sak dan tur a hmunah a en a, Zuangtui Veng mipuiten football field siam an rawtna hmun pawh a en nghal a ni.

Minister hi Tourism Department, PWD (Building) leh Sports and Youth Services Department hotuten an tawiawm a ni.