2303/2022-2023

Aizawl 13.10.2022:  Vawiin khan Pu Lalhmachhuana Zofa lehkhabu ziah pahnih - "Mizoram Political History (Record & Document)" leh "Mizo Lui Hmingthangte" Tourism Minister Pu Robert Romawia Royte-in a office chamber-ah mipuite chhiar theih turin a tlangzarh.

Tourism Minister Pu Robert Romawia Royte chuan thu sawiin lehkhabu tam tak lo ziak tawhtu Pu Lalhmachhuana Zofa in Zofate leh hun lo la awm zel tura thangtharte tan leh hnam leh ram tana rohlu lehkhabu rotling pahnih a ziak thar leh hi lawmawm a tih thu a sawi a. Ram changkang leh hnam pui zawkten lehkhabu an chhiar nasat angin Mizoten lehkhabu chhiar kan uar a, kan intihhmuh deuh deuh a tul a ni a ti.

Pu Robert Romawia Royte chuan social media hmang ringawta hriatna leh thil thar kan bawh a, kan innghat hi a fuh tawk lohna a awm a, lehkhabu atanga hriatna kan lak thar leh hi a hun tawh tak zet a ni. Zofa ziak miten thu tha tak tak min ziahsaka min hlui laiin mipui lamin lehkha chhiar kan peih loh avangin a nihna tur kan la nihpui pha lova, lehkha chhiar tam kawngah tan kan lak thar a pawimawh a ni a ti.

Pu Lalhmachhuana Zofa hian lehkhabu chi hrang hrang tam tak a lo ziak tawh a. Chungte chu - Infiamna chanchin lehkhabu 5, Thawnthu bu 13, Bengvarna lam bu 21, Milem bu 71, Thawnthu tawi/ Novel/ Article bu 11, History bu 26, Fiamthu bu 4 te a ni. Hengte bakah hian chhuah mai theih tur lehkhabu chi hrang 19 a nei bawk a ni. Pu Lalhmachhuana Zofa hian lehkhabu ziak mai ni lovin hla thahnem tak a lo phuah tawh bawk a. Radio Artists parukin a hlaphuah hi an sa a, Music Video 27 leh hla 32 zet Mizo zaithiamten a hlaphuah an lo sa tawh bawk a ni.

He lehkhabu tlangzarhna inkhawm hi Pu L.Thangmawia, MLA, Human Resource Development Board Vice Chairman-in a kaihruai a, Rev. Zothansanga'n hunserh hmangin, Rev. Dr. Ngurthanpara Sailo-in lehkhabu tlangzarh takte thlirlawkna hun a hmang a.  He hunah hian Pu H.Biakzaua, MLA leh thu leh hla lama tui mi engemaw zat an tel a ni.