1920/2023-2024

Aizawl, the 18th September, 2023: Lakhimpur Battalion, 2 Assam Rifles buatsaih hnam inpumkhatna chawinunna tura ruahman, National Integration Tour (NIT) 2023 a kal tur Mizoram Journalist Association member 8, Zirtirtu 2 leh anmahni hruaitu turte chu vawiin chawhma dar 10:30 khan Tourism Minister Pu Robert Romawia Royte chuan Gajraj Hall, 2 Assam Rifles tualzawl atangin a vailiam.

National Integration Tour kal turte thlahna pual inkhawm tawi buatsaihah Tourism Minister Pu Robert Romawia Royte chuan National Integration Tour thil tum ropui a tih thu leh tun dinhmun ngaihtuaha hnam inpumkhatna lam hawi program buatsaih a ni chu finthlak a tih thu sawiin, hnam inpumkhatna tour kaltlanga MJA member leh Zirtirtute tana tour buatsaih chu lawmawm a tih thu a sawi a. Assam Rifles-te hmalakna chhuanawm tiin, tour-a kalte'n tawnhriat thar hrang hrang an neih turte tangkai taka an hman ngei a beisei thu a sawi a. Mizo hnam ziarang leh nunphung mawi tak takte midangte zirtira lantirtu nih tum tur leh hnam inpumkhatna kawnga Mizoram Sawrkar leh Assam Rifles hmalaknate bakah Mizoram Tourism chungchang tarlangtu nih tum turin a chah nghal bawk.

India ram bung pawimawh tak North Eastern Region chhunga hmun pawimawh tak tak tlawh turte chu a lawmpui thu sawiin, thiamna leh hriatna zau zawk a pek belh ngei a beisei thu a sawi a. Prime Minister-in tourism chawilar nan khua leh tuite khualzinmite tlawh thin tourist destination kum khata hmun 12 tal tlawh tura a chah thu sawiin, Tourism Minister chuan Mizo mipuite chu tourism chawilar nan mai bakah rilru leh taksa tih hrisel nan Mizoram chhunga khualhip nasa tourist destination pawimawh tak tak te, pipu sulhnu leh mahni khawchhuahnate tlawh thin turin a chah nghal bawk a. Hnam inpumkhatna chu Sawrkarin a ngaih pawimawh thu leh hemi vawngnung tura theihtawp chhuaha tan a lak reng thu a sawi a. National Integration Tour kal turte chu hnam inpumkhatna rilrua vawng reng tur leh an vahvelna bakah an thu leh hla chhuahahte tarlang tam deuh deuh turin a chah a ni.

Tour kal turte thlahna inkhawm Gajraj Hall-a neihah hian Major Aditya Sombanshi, Adjutant, 2 Assam Rifles hnen atangin tour neih dan tur tlangpui ngaihthlak a ni a. He hunah hian Brig. Girish Upadhya, Deputy Inspector General (DIG), 23 Sector Assam Rifles, Col Mukesh Sauhta, Commandant, 2 (Lakhimpur) Battalion, 2 Assam Rifles leh a thawhpuite, MJA Hqrs. Aizawl President Pu C.Lalrambuatsaiha leh a thawhpuite an tel a ni.

National Integration Tour 2023 a kalte hian vawiin hian Mizoram chhuahsanin Assam an pan a. An cham chhung hian Assam, Arunachal Pradesh leh Meghalaya State-a hmunhma pawimawh hrang hrangte an tlawh dawn a. Ruahman dan chuan September ni 26, 2023 hian tour zofelin Mizoram an rawn let leh dawn a ni.