1919/2023-2024

Aizawl, the 17th September, 2023: India ram puma kalpui tur PM Vishwakarma Scheme  hawnna chu vawiin khan Vishwakarma Jayanti leh Prime Minister pian champhaphak vawi 73-na pualin neih a ni a, he hun hi India ram hmun hrang hrang 70 chuangah hman niin Mizoramah chuan he scheme kalpui tur pual hian chawhma dar 10:30 khan Vanapa Hall-ah hun hman a ni. He hunah hian Pu B.L. Verma,  Sawrkar laipui DoNER Minister chu khuallian niin Pu Lalruatkima, I&PR Minister chu khualzahawm a ni. DoNER Ministry Official-te, State Govt. Official, kutthemthiamnaa eizawng leh sawm bik dangte an tel a ni.

Khuallian DoNER Minister Pu B.L. Verma chuan kalkhawmte lawmna chibai bukin Mizoram a lo thlen atanga duhsakna hrang hrang a dawn avangin lawmthu a sawi a. Langlo lama tangkai taka ram tana hnathawktu kutthemthiam, thiam thil hrang hrang neite hmalakna ropui a tih thu sawiin, an hmalaknate chawisanga ram tana an hnathawh hlu tak hriatpuina leh tihchangtlunna tur PM Vishwakarma Scheme duan chhuah a ni chu lawmawm a tih thu a sawi a. Hemi kalpui tur hian Sawrkar laipuiin cheng vaibelchhe 13,000 a ruahman thu leh Ministry 3 in an kalpui dawn thu sawiin, hemi hnuaia hamthatna dawngtu Vishwakarma-te chu sum leh paia tanpuina, training & stipend, hmanraw leina tur Rs 15,000/- thleng leh an thil dehchhuahte hralhna thenga ngaihtuah sak tum an nih thu a sawi a. Dahkham ngai lovin loan pung tlem cheng nuai 3 thleng a lak theih dawn a, chhawmdawlna dangte pawh pek an ni dawn a, hei hian nasa taka puiin an tan kawng zau tak a hawng thei dawn a ni, a ti bawk.

DoNER Minister chuan sawi chhunzawmin, kutthemthiamna pipu hun lai ami chhawmnung zelte tuamhlawm chu ngaih pawimawh a nih dawn thu a sawi a. Mahni kutkawiha thil siam chhuah tih changtlun leh zawrh chhuah thlengin a pui thei dawn a ni, a ti a. A bultan nan thiamthil hrang hrang siamna trade 18 ahte bultan a nih dawn thu leh, thingtlang leh khawpuite tuam chhuah vek tum a nih thu a sawi a. Hnathawhna bungrua leh hmanraw changkang zawk pek an nih dawn thu tarlangin, hei hian thil siam hlutna a tihpun phah dawn bakah a hralhna chenin a pui thei dawn a ni a ti bawk. Heng bakah hian Sawrkar laipui hmalakna hrang hrangte leh hemi kaltlanga hlawhtlinna hrang hrangte a tarlang bawk a. Prime Minister-in North East hmasawnna a ngaih pawimawh thu sawiin, inkalpawhna kawngpui, inbiakpawhna leh hmasawnna hrang hrangte a tarlang a. Mizoramah pawh DoNER Ministry leh Ministry dangte kaltlangin hmasawnna ruhrel pawimawh siam nual a nih thu a sawi a. Kum 10 kalta chhungin NEC scheme kaltlangin Mizoramah project 103, cheng vaibelchhe 554.19 hu sanction a nih thu a sawi a. Mizoram mipuite chu PM Vishwakarma Scheme hlawhtling taka kalpui a nih theih nana theihtawp chhuahpuiah a sawm nghal bawk.

Khualzahawm I&PR Minister Pu Lalruatkima chuan kutthemthiamte tihhmasawnna kawnga hmalakna 'PM Vishwakarma Scheme' duan chhuah a ni leh Mizoramah pawh kalpui a ni tur chu lawmawm a tih thu a sawi a. Tualchhung kutthemthiamte hnathawh hriatpuina mai bakah chhawmdawl nana tangkai tak tur a ni a, hei hian Sawrkarin kutthemthiamna hmanga mahni phak tawka eizawngte a thlahthlam loh zia a tarlang a ni, a ti a. Tuna hmalak mekna atanga huang zauh mai bakah hnasawn ngaihna laite siamthatna tur a ni tel a ni tiin, hei hian sum leh pai dehchhuah kawngah anmahni bakah ram leh hnam a pui thei dawn a ni, a ti a. Scheme pawimawh tak tihlawhtling tura theihtawp chhuah tlan a pawimawh thu a sawi a. Khua leh tuite'n hamthatna an hmelhriata an chhawr tangkai theih nan leh PM Vishwakarma Scheme hlawhtling taka kalpui a nih theih nana tan lakpuiah kalkhawmte a sawm a ni.

Thusawitu dang Chief Secretary Dr. Renu Sharma chuan ram leh mipui mamawh hrang hrangte siamtu kutthemthiamte hnathawh Sawrkarin hriatpuia chhawmdawlna tur a duang chu lawmawm a ti a. Mizo society a pawimawh tak kutthemthiamte chawikanna tur scheme chu thiam thil hrang hrang pipu atanga lo chhawm tawhte chailar nan a tangkai dawn thu leh industry lian awm lohna Mizoramah a tangkai dawn thu a sawi bawk.

He hunah hian Pu Lalmalsawma Pachuau, Secretary, Planning & Programme Implementation Department chuan kalkhawmte lawmna thu sawiin, Pu R. Lalramnghaka, Secretary, Commerce & Industries Department leh Pu Angshuman Dey, Joint Secretary, DoNER te hnen atangin thusawi ngaihthlak a ni bawk.

Vawiin hun hman zawh hian India International Convention and Expo Centre (IICC)/Yashabhoomi, Dwarka, New Delhi-a ram chhung hmun hrang hrangte puala Prime Minister hova hun hman chu live streaming kaltlanga zawm a ni a. Prime Minister thuchah tlangpui Mizo tawngin Pu Pratap Chhetri, Deputy Director, I& PR Department hnen atangin ngaihthlak a ni a, Pu Lalramsanga Sailo, Secretary, Labour, Employment, Skill Development & Entrepreneurship (LESDE) chuan lawmthu sawiin hun hman a khar a ni.

Scheme thar PM Vishwakarma Scheme hian mahni kutkawih leh hmanraw neih ang angte tangkai taka hmanga kutthemthiamna hrang hrang neite hmalakna hriatpui leh chhawmdawl hna a thawk dawn a. An thil dehchhuah hlutna ti sang tur leh MSME value chain nena thlunzawm thei tura duan a ni a. A hawnna hun hi India ram hmun hrang hrang 70 chuang atanga zawm a ni a. A bultan nan hian cheng vaibelchhe 13,000 ruahman niin Traditional Trade 18 ah kalpui a ni dawn a, Ministry of Micro, Small & Medium Enterprise chu Nodal Delar a ni a, beneficiary zawn chhuah, thiamthil tipung tura training pek, sum leh pai tanpuina pek leh an thil siam chhuah hralhna tur ngaihtuah thleng a huam a. Hamthatna dawng theite chu PM Vishwakarma Portal-ah biometric hmanga inziahluh theih niin PM Vishwakarma Certificate leh ID Card pek an ni ang a, scheme hnuaia hamthatna awmte an dawng thei dawn a ni.