1918/2023-2024

Khawzawl, 17th September 2023: Nizan khan Deputy Chief Minister, Tuichang AC bialtu ni bawk Pu Tawnluia chuan Khawzawl District Volleyball Association (KZDFA) buatsaih Mazuala Memorial Mid Season Tournament kharna hun chu khuallian niin a hman pui.

Khawzawl Dinthar Volleyball Court-a tournament kharna inkhawm tawi neihah thu sawiin Pu Tawnluia chuan an fapa neihchhun PC Lalhmangaihzuala hriatrengna Volleyball Tournament hlawhtling leh thianghlim tak buatsaih a ni thei chu lawmawm a tih thu a sawi a. Tournament buatsaihtu KZDVA te chungah lawm thu sawiin, tournament chuan Khawzawl district thalaite nunah hmasawnna a thlen ngei a beisei thu a sawi.

Deputy Chief Minister Pu Tawnluia chuan thalai ten hma an sawn theih nan sawrkarin kawng tam takah hma a la a ni, a ti a. Khawzawl District chhunga infiamna hmunhma tun sawrkarin a din leh chei that hrang hrang - Mualvawm Field, Dinthar Volleyball Court, Electric Veng Basketball Court, Vengthar Badminton Court, PWD Tlang Tennis Court te chu tarlangin ram pum huap inelna thlenna tlak vek an nih thu a sawi a. Mualvawm field bulah Futsal Ground siam mek a nih thu leh Khawzawl Vengtharah Futsal Ground siamna tur sum hmuh a nih tawh thu a tarlang bawk. Thalai kalkhawmte chu hma thlir thui tak nei tur leh tangruala Khawzawl District hmasawnna tura theihtawp chhuah turin a chah a ni.

Mazuala Memorial Tournament-ah hian mipa team 12 leh hmeichhe team 4 an tel a. Hmeichhe Final-ah Khawzawl Vengthar GSA te chuan Khawzawl Kawnzar GSA chu 16-25, 25-20,24-26,15-25  a hnehin an champion a. Best Setter-ah  Esther VL Ngaihsaki, Khawzawl Vengthar GSA thlan niin, Best Spiker-ah Lalmuanpuii, Khawzawl Vengthar GSA thlan a ni. Hmeichhe champion hian pawisa fai ₹15,000 leh nomawi an dawng a, pahnihna hian pawisa fai ₹10,000 leh nomawi an dawng thung. Mipa final-ah Khawzawl Zaingen GSA leh Tualte GSA inkhelin, Tualte hian Khawzawl Zaingen hi 25-22, 25-23, 22-25, 25-22 in an hneh a. Best Setter-ah F. Vanlalruata, Tualte GSA thlan a ni a, Best Spiker-ah Vanlaltanchhana, Zaingen GSA thlan a ni. Mipa champion hian pawisa fai ₹25,000 leh nomawi an dawng a, pahnihna in pawisa fai ₹12,000 leh nomawi an dawng a ni.

Tournament kharna inkhawm hi KZDVA Fin. Secretary Pu K. Lalramnghaka chuan a kaihruai a, General Secretary Pu K. Lalchhanchhuaha chuan Tournament hming put chhan Pu PC Lalhmangaihzuala chanchin chhiar chhuahna hun a hmang a. Mizoram Volleyball Association Jt Secretary Pu RK Hmingthanga pawhin thu sawina hun a hmang a, KZDVA Vice President Pu B. Darsanga’n lawmthu sawina hun hmangin hun a khar a ni.