Nimin  (28.12.2019) khan Sialsuk  Khawtlangin Kite Festival an buatsaih vawi 1-na chu  Minister of State for Tourism Pu Robert Romawia Royte’n  a hmanpui a. Kum tina an lo neih thin Sialsuk Winter World Cup Football Final pawh  a hmanpui bawk.

Sialsuk Lehkhachaih Kut (Kite Festival)-ah hian hmun hrang hrang atangin mi an kalkhawm tam hle a, Sialsuk tlang nuam leh rem takah hian Lehkhachaih an chaih sup sup a, a chhimtu ten nuam an ti hle. Minister Pu Robert Romawia Royte chuan Sialsuk khawtlangin Kite Festival an buatsaih chu lawmawm a tih thu sawiin kumtharah chuan Sorkar nen tangkawpa phuisui zawka he Festival hi tih theih a duh thu a sawi.

Minister hian sap naupang Mary Winchester mantu Sailam Lal Bengkhuaia hmun hlui te tlawhin Mizo history leh Mizo Kristianna chanchina thil thleng pawimawh a nih thu a sawi a. Sailama Local Sports hman mek a telpui bawk.

Sports Minister ni bawk chuan Phulpui GSA buatsaih Phulpui Haw Runpui Football League Final Match a chhim bawk a. Playground-a function buatsaihah Phulpui daia Zawlpala thlan tlang leh hmun pawimawhte chu Hnam tana pawimawh a nih avangin Khualzin tam zawk hip tur zawnga cheibawl tul a tih thu a sawi. Pu Robert Romawia Royte hian Hmuifang Tourist Resort-a Aerial Pathway siam hnathawh mek a endik bawk a, Hmuifang Football Ground siam mek chhunzawm dan tur khawtlang hruaitute a sawipui bawk a ni. Minister hi Tourism Director Pu Saitluanga, MSSC Secretary Pu C.Laltlanthanga leh Pu Vanlalrova, Deputy Director, SYS ten an tawiawm a ni.