Anthurium Festival 2016 neih dan tur sawihoin, Tourism Secretary Pu V.Lalremthanga kaihhruainna hnuaiah vawiin khan a office roomah committee neih a ni.

Meetingah hian Anthurium Festival lo pian dan tarlanna neiin, sorkar laipuiin atam thei ang ber KUT buatsaih tura a tihah, pipute atanga kan chhawm nun, Chapchar kut leh Thalfavang kut tihloh kut hrang hrang dang kan neihte hman a rem loh avangin central lamin min phalsak angin hming phuahchawp kut buatsaih anih tak thu sawilan a ni a. Hemi atan hian Mizo hming chawia ‘zozam kut’, ‘mau kut’ leh ‘dingdi kut’ tihte ruahman chhin niin, hman a remloh lehzel avangin khawvelin a hmelhriat sa, Zofaten kan uar chhoh ve tak leh rampawn thleng pawha kan thawnchhuah ‘Anthurium’chu festival hming atana thlan anih tak thu tarlan a ni a. Meeting chuan kum danga programme a tel thin te bakah agenda chhawpchhuahte sawihona neiin, Mizo zu chi hrang hrang puitling tawhte hnenah phalna neiten lei theih tura phochhuah te, Anthurium Girls bakah Anthurium Miss thlanna siam ni bawk se an ti a. Heng bakah Adventure Park- low rope course, zip lining, jummering/rappelling/ rock climbing leh camping awmna buatsaih nise tih leh thlalak pholanna hmun siam te an rel a ni.

Central sorkar bultumnain Anthurium Festival hi kum 2006 atang khan hman thin a ni a, kumina senso tur atan Cheng nuai 25  a rawn pe tawh a, September  ni 22, 23 leh 24 chhung hian ni thum chhung awh turin Reiekah hman a ni ang. Committee memberte hian ni 19 Aug 2016 khian Kut neihna hmun tur hi an han thlithlai ang a, meeting hi ni 23rd August 2016 ah neih leh a ni ang.