Nimin tlai 2:30 khan Pu John Rotluangliana, Minister i/c FCS& CA etc, chuan  Saiha Circuit House-a amah hmuahna-ah thusawiin FCI atanga Buhfai KG-a Rs.28.81/-a kan lei thin kha, Local Supplier atangin KG-ah Rs.25.75/- in lei tur kan hmu tak avangin, thlatin cheng vaibelchhe Rs.7/- aia tam kan save phah a, kum khatah phei chuan vaibelchhe Rs.90/-vel  kan save phah a ni, a ti a. FCS&CA Department hi Economic Measures la nasa ber department kan ni hial mai thei a ni, tiin, thil  man sang chho zel avangin Buhfai KG-a Rs.9.5/- a hralh thin kha Rs.15/- a hralh a lo tul ta a ni, a ti bawk a.  Quata leh Special Permit te kan titawp vek avangin, Godown-a Buhfai Stock pawh a tam phah sawt a ni, a ti.

School tan hma chungchang sawiin, Pu John Rotluangliana  chuan Aizawl Traffic tih thawl nan maia School Timing thlak anga Zokhaw lama  mipuite hnena tuten emaw an sawi thin chu thudik lo a ni, a ti a. Zing thawh tlai leh zan men rei Culture Mizo te zinga intuh mek siam that nan leh Mizoram mipuite a hnam ang a kan lo hrisel zawk thei nana tih kan ni a, tunah chuan zing thawhna chang hre lo pawhin dar 6-ah chuan an tho val val tawh a ni, tiin Bible in  “ Mu rei suh , I lo pachhe dah a nge” min tih hi i hre reng ang u, a ti bawk. Zirlai Naupang  KG-I atanga tho  hma tawh chuan Class-X vel a zir thlen chuan thawh hma chu habit-ah a neih tawh ang, heng te thlir hian School kal hma  kal tlangpui hi tha kan ti  a ni, a ti bawk.

Zu chungchang sawiin, Pu John-a chuan “Zu zuar Sawrkar” te min ti a, kan Sawrkar hian Zu a zuar reng reng lo, a zawrh phalna Permit chauh a ni kan pek, a ti. Dawrpui venga cheng ka ni a, kan kawmthlang lawkah  leh kan kawmchhak Millenium-ah Zu zawrhna a awm a, rui hut hut leh rui buai ka la hmu lo, a ti a.  India ram khawpui Zu tamna hmunah pawh  kan fa te ring ngamin lehkha zirturin kan tir tho si a, Mizoram a nih tak avanga buai tura kan ngai tlat hi  thil hi kan ngaituah chian lo vang a ni, tiin  kan sawrkar chuan huaisen takin kan kal tlangpui dawn a ni, a ti bawk.

Pu John Rotluangliana chuan MADC  Executive Member te tlai dar 4:00 ah kawmin, Saiha District-a Tourist Lodge 10 te chu (Saiha khawchhunga  mi tiam lovin)  MADC hnena Lease dan tur a sawipui a, “Deed Of Lease” leh “Memorandum of Understanding” Tourism Department, Gov’t of Mizoram  te Draft sa chu MADC hotute lo zirchian atan a hlan a. DEEDS leh MoU te an zir chian hnuah,  sawiho leh turin an rel.

Pu John Rotluangliana hi Pu TT Zothansanga, Parliamentary Secretary, Pu K.Lianzuala, KVI Board Chairman, Pu Vabeiha Hlychho, Director, Tourism Deptt.,  Andrew H.Vanladika, Jt.Director, FCS&CA, Pu Remmawia, Jt. Director,Transport, Pu Apeto Lawmsanga, Adviser to CEM, LADC te leh Tourism Department-a Officer thenkhat ten an tawiawm a ni.