Vawiin khan Trade & Commerce Minister Pu H. Rohluna leh Parliamentary Secretary Pu Joseph Lalhimpuia te chuan department hnathawh dan leh hmachhawpte sawihovin Minister Office Chamber-ah Trade & Commerce Department officer-te nen inkawmna hun an hmang.

Minister chuan department official-te chu hna tha taka thawhhopui turin a sawm a. Amah puitu Parliamentary Secretary nen langtlang tak leh inpawh taka hna an thawh tur thu te, department thawhpuina nen chuan Central Sorkarah pawh chak taka thil bawhzui ngaite an kalpui theih tur thu te a sawi a. Department hnathawh hi Minister hian a khat tawkin hlawhtlinna an neih dan te enpui zel a tum thu a sawi bawk.

Pu Joseph Lalhimpuia pawhin Sorkar laipui atanga department hnathawhna tur kawng hrang hranga sum haichhuahtur zawn kawngah department hruaitute chu tan la turin leh Detail Project Report (DPR) siam kawngahte chak taka hma la zel turin a fuih a. MAMCO hnathawhna chungchang fakin sawhthing her rona te pawh kan neih thuai a beiseiawm a ti a. Indo-Myanmar leh Indo-Bangladesh Border Trade a ngaihpawimawh thu Parliamentary Secretary chuan sawiin, Kaladan Multi Modal Transit Transport Project chu hawn thuai a nih theih nan hmalakpui turin department hotute chu a sawm bawk a ni.