Mobile, telephone leh cable TV chungchanga thuneitu sang Telecom Regulatory Authority of India (TRAI) chuan vawiin khan Aijal Club-ah Hmarchhak Bial tan ‘Regional Workshop on Consumer Education’ an buatsaih. He Workshop ah hian TRAI hotute; Mizoram Consumer Union hruaitute thahnem tak; Consumer Protection Asssociation (CPA) Tripura hruaitu leh College hrang hranga Consumer Club aiawhte an tel a. Mobile Company leh Digital satellite company hrang hrang – Aircel, Airtel, BSNL, Idea, Loop, MTS, Reliance, Tata, Videocon leh Vodafone te bakah Zonet aiawh te pawh an tel bawk a ni.
Workshop hawngtu TRAI Principal Advisor (CA &IR) Pu N Parameshwaran chuan TRAI hnathawh leh kalphung te sawiin TRAI chuan telephone,mobile service leh cable TV bikah consumer te inzirtirna leh inhrilhhriatna programme bakah consumer te hamthatna leh dikna an ngaih pawimawh thu a sawi. Mobile company te service hrang hrang a bikin Value Added Services(VAS) leh mobile balance cut chungchangah lungawih lohna a tam thu sawiin TRAI chuan Draft Telecom Policy thar an duan mek thu a sawi bawk a ni. TRAI hotute chuan September 2014 thleng a tahtawlh in rampum a Cable TV signal zawng zawng chu digital a leh vek a nih tur thu an puang bawk a ni.
Vawiin Workshop ah hian telemarketing calls leh telemarketing SMS te mobile hmangtu ten an mobile a an dawn loh nan, phone no 1909 a SMS hmanga in register dan leh website www.nccptrai.gov.in kaltanga heng call te sms te block dan tarlang a ni a. Mobile phone hmangtu ten an dil loh Value Added Services(VAS) eng chi mah Company ten consumer te an hnawn leh an pek a thiang loh thu TRAI hotute chuan sawiin heng thil hi chu consumer te duhthlanna liau liau a ni tur a ni an ti. Mobile phone atanga nikhatah SMS za aia tam thawn chhuah theih loh TRAI in tunhnaia a bithliah chu SMS za hnih thleng tih a thlak a anih thu leh hei hi telemarketing calls leh SMS te tihtlem nan TRAI chuan a ruahhman thu an sawi bawk a ni.
Mobile Company hrang hrang ten mobile hmangtute lungawi lohna reng reng tihfiah leh tihkian nan ruahmanna hrang hrang an siam leh an duan te chu presentation hmangin an hrilhfiah bawk a ni. Mobile company te service chungchang, consumer te lakah an tih tur leh an tih loh chin tur te, leh tun aia service tha zawk mobile hmangtu ten an neih theih nan sawihona hun hman niin hetah hian MCU hruaitutu leh CPA aiawh chuan rawtna an thlen nghal a ni.
TRAI hi Sorkar Laipui in kum 1997 khan telephone, mobile leh cable TV company te khuahkhirh(regulate) nan, consumer te laka Company ten an hlenchhuah tur bituk nan leh leh hemi chungchangah Sorkar Laipui thurawn pe tur a din a ni.
