270/2026-2027

Dated Aizawl, the 24th April, 2026: Vawiin khan Commerce,Industries, Geology and Mining Department leh Raising and Accelerating MSME Performance (RAMP) te ṭangkawp chuan  I&PR Conference Hall, Lianchhiari Rûn ah Train Carriage Booking System leh UNNATI Scheme chungchang workshop an buatsaih a. He hun hi Dr. H Lianzela, Secretary, Commerce, Industries, Geology and Mining Department chuan kaihruaiin, workshop hi hun hniha ṭhen a ni.

Workshop-ah hian chawhma lamah UNNATI scheme chungchanga hriattur pawimawhte inzirtirna hun hman a ni a. Pu Zorema Darkim, Project Implementing Unit (UNNATI) chuan presentation hmanga kalkhawmte zirtirna pein, UNNATI Scheme nihphung leh a dildan kal hmangte a sawi zau a. Kalkhawmte nen zawhna leh chhanna hun hman nghal a ni. 

Hun hnihna chawhnu lamah hian North East Frontier Railways leh Pu Lalhmunsiama, Additional Director, Directorate of Commerce and Industries te’n hun an hmanga. North East Frontier Railways-te hian rel (train) hmanga bungraw lakluh leh thawnchhuahdan chungchangah zirtirna an pe a. Pu Lalhmunsiama, Additional Director, Directorate of Commerce and Industries chuan Trade Receivables Discounting System (TReDS) leh LEAN (MSME Competitive) scheme chungchang presentation hmangin zirtirna a pe bawk a ni.

Vawiina workshop-ah hian sorkar department hrang hrang bakah industries association-te leh entrepreneurs ṭhahnem tak telin, UNNATI scheme huapzau zawka kalpuina atana hmalakdan turte an sawi ho nghala. Pu Rinawma, Joint Director (Admin), Directorate of Commerce & Industries chuan lawmthu sawiin hun hi a khar a ni.