269/2026-2027

New Delhi, the 24th of April, 2026: Mizorama October thlaa Tourism Conclave neih tur leh, chumi inbuatsaihna’n a New Delhi-a Pre-Conclave meeting neih tur chungchangah vawiin chawhma khan Tourism Minister Pu Lalnghinglova Hmar leh NITI Aayog officer te chu Chanakyapuri, New Delhi-a Mizoram House ah an inkawm a, Conclave hlawhtling leh Mizoramin a hlawkpui ngei tur buatsaih tura hmalak ho dan tur an sawiho. NITI Aayog officer te hi Pi Swapnalee Bhattacharya,ISS, Dy. Director General in a ho a ni.

Mizoram Tourism Minister Pu Lalnghinglova Hmar chuan Sairang thleng rel a luh hnuah Mizoram tlawhtu an pung nasa tih a sawi a. “Sairang thleng rel a luh hnuah Mizoram tlawhtu chu chawhrualin thlakhatah nuai khat an chuang tawh a, thlawhtheihna leh rela inkalpawhna a awlsam tawh avangin an pun zel kan ring. India rama thlasik khawpui (Winter Capital of India) ni thei turin hma kan la mek a, Mizoram tlawhtute rei zawk an châm theihna’n an tlawh tur leh tihtur tam zawk buatsaih kawngah hmalakna a kal mek a ni,” a ti.

Vawiina meeting-ah hian ‘pre-conclave meeting’ chu May, 2026 ah Vigyan Bhawan, New Delhi-ah neih nise tiin rel a ni a. NITI Aayog leh Mizoram sawrkar thawhho dan tur leh, meeting neih tur kaihhnawiha mawhphurhna hrang hrang insem dan turte sawiho a ni.

Pre-conclave ah hian Mizoram hmasawnna tur uluk taka ngaihtuahin, India rama Tourism kaihhnawih industry langsar leh stakeholder dangte nen ‘brainstorming’ neih a ni ang a, chuta tanga hmalakna tur lo langte chu October-a Mizoram Tourism Conclave neih hunah a taka kalpui turin ruahmanna siam nise tih a ni. Conclave tihlawhtling thei tur mi pawimawh hrang hrang sawm tur leh, programme kimchang chu Mizoram Tourism department nen uluk zawka ennawn a thutlukna siam nise tiin rel a ni bawk.

NITI Aayog member Dr. VK Paul leh Pu Lalnghinglova Hmar te chu nikum November ni 10 khan NITI Bhawan, New Delhi-ah Mizoram tourism hmasawnna'na NITI Aayog leh Mizoram sawrkar hmalak ho dan tur ngaihtuahin an inkawm a, an thurel zingah Mizoram Tourism Conclave buatsaih hi a tel. Tourism inkhawmpui hi kumin October thlaah neih tura ruahman niin, stakeholder tam zawk an tel theihna tur leh, Mizoramin a hlawkpui theih tur zawnga ruahmanna siam nise tih a ni a. Niti Ayog rawtna angin Tourism Conclave inbuatsaihna pakhatah ‘pre-conclave meeting’ neih hi rel niin, NITI Aayog leh Mizoram sawrkarin hma an la dun mek a ni.

Meeting-ah hian Pu Alexander V. Chongthu, Addl. Resident Commissioner, Mizoram House, New Delhi leh Pu H. Lalramenga, PS to Minister te’n Minister an tawiawm a; NITI Aayog atangin Dy. Director General bakah Dr. Priscilla C. Ngaihte, CG-II, Public Policy Specialist leh Pi Aashna Sharma te an tel a ni.