268/2026-2027

Dated Khawzawl, the 24th April, 2026 : Vawiin khan KVK Khawzawl training hall-ah thlai chi semna hun hman a ni a. He hun hi Dr. Malsawmkimi, Senior Scientist & Head chuan kaihruaiin, Chawngtlai leh Neihdawn khua atanga kuthnathawktu thlan bik, hma la zau tur mi 43-te hnenah thlai chi tha an lo hriat tawh te - Hmarchapui (Arka Harita, Arka Tejesvi), Bawkbawn (Arka Keshav) leh Bawrhsaiabe (Arka Nikita) chi leh a enkawlna tur Indian Institute of Horticultural Research (IIHR-NEH) Scheme hnuai atangin pek chhuah an ni.

Dr. Malsawmkimi chuan vawiina kuthnathawktu kalkhawmte hnenah thlan bik an nihna chhan sawifiahin, KVK Khawzawl chuan theihtawp chhuaha kan district kan lo intodelh a, district pawn lam atang pawha heng kan thawhrim rah an lo chhawr theihna tura heng thlaite hi a ching tur bik thlan chhuah an nih thu a sawi bawk a ni.

He hunah hian Pi R. Vanlalduati, Subject Matter Specialist (Soil Sc.) chuan kalkhawmte hnenah an thlai chinte leitha an pek danah fimkhur tura chahin, leitha inbuk tawk lo pekin kan leilung a khawih pawi theih dan leh leitha pek dan dik lovin thlai leh leia a nghawng thalo te, leitha inbuk tawk pek a pawimawhzia leh biofertilizers hman tul tawh zia leh thlai tana an tangkaina hrang hrang kuthnathawktu kalkhawmte hrilh hriatna a nei nghal bawk.