Vawiin khan MYC Chairman Pu T. Sangkunga hovin Horticulture Conference Hall-ah thla ruk chhung Emporium Training & Consultancy Pvt. Ltd., Kolkata-a training tur batch hnihna mipa hlang mi 40 te thlahna hun leh thil pawimawh inhrilhhriatna hun hman a ni. Training turte hi Labour, Employment & Industrial Training Department leh Mizoram Youth Commission bultumin thla ruk (6) chhung “Certificate Course in Aviation, Tourism & Hospitality” zir tura thlan an ni a, LE&IT Director Pu Rotluanga pawhin a telpui a ni.

Vawiin hun, Dr. J.T. Vanlalngheta, MYC Secretary kaihhruaiah hian Pu T. Sangkunga chuan training a kal tur te chu mahni senso awm miahlo a hna hmu ngei thei tura training-a an chhuak tur chu an vanneih zia hre reng chungin, hrehawm tuar pawh huama zir turin a chah a. An zir lain an nun uluk a, ruihtheihthil laka fihlim turin leh midangte tana entawntlak a awm turin kalkhawmte chu a chah a ni.

LE&IT Director Pu Rotluanga pawhin training turte chu an hriattur tul pawhmawhte hrilhin, chhel leh taima taka zir turin a chah bawk ani.

Certificate Course mai bakah hian kumin June thla a Skill Fest neih zawh tak a Vocational Training Providers (VTP)-te hnuaia training turin mi 114 tirhchhuah an ni tawh bawk a. Tunah hian mi 286 dang kal mai thei dinhmunah an awm mek.