Vawiin khan NLUP Implementing Board Conference Hall-ah Pu H. Liansailova, Vice Chairman, State Planning Board hovin NLUP Line Department-te bakah Revenue, Rural Development leh Planning Department-te leh NABARD, College of Veterinary Sciences & Animal Husbandry (Selesih) leh MZU mithiamten NLUP kalpui mek chu kum 5 dang kalpui leh dan tur sawihona hun hman a ni. Hei hi 13th NLUP Apex Board, 5th June, 2014- a Chief Minister hova neihin a lo pawmpui tawh bawhzuina a ni.

Vawiin hunah hian Pu J.H. Rothuama, Chairman, NLUP Implementing Board chuan member lo kalte lawmna hun leh tul dang pawimawhte sawi hawnna a nei a. Hemi hnuah hian Officials leh mithiamte chuan NLUP kalpui mek leh kalpui zel dan tura hmalak dan tur uluk takin an sawiho. NLUP Line Department leh mithiam kal khawmte chuan kum 5 kal ta chhunga NLUP kalpui dan tha leh tha lo laite chipchiar takin an thlirho a.

NLUP Line Department-te chu a tul anga mithiamte rawn chunga NLUP kalpui zel dan tur ruahmanna July, 2014 chhung ngeia siam peih turin ngen an ni. He ruahmanna siamte hi a tul anga Sorkar laipuia a kaihhnawih Ministry hrang hrangte be rawn chunga sawiho zel a nih hnuah DPR siam tura hmalak zui nghal tura rel a ni.

Central Sorkar tharin NLUP (National Land Use Policy) kalpui tura ruahmanna a siam mek chungchangah Mizoram Sorkarin Flagship Programme (NLUP) a kalpui mek nen inanna tam tak a awm avangin, tun aia tha leh changtlung zawka NLUP thuamthat leh kalpui zel dan tura ruahmanna siam hi harsa lo tura ngaih a ni.