Vawiin khan Mizoram a Doctor te chuan India ram hmun dang ang bawkni July ni 1 apiang a kumtin a hman thin National Doctors' Day pual in District hrang hrangah hun an hmang ve a.

Aizawl District bik ah chuan 'Doctor te ni' hi Civil Hospital Auditorium ah infuih thar leh nan te leh Seminar buatsaihna atan hman a ni. Aizawl a Doctors' Day hmanna programme hi Indian Medical Association, Mizoram President Dr.Vanlalruata'n kaihruaiin Dr.K.Ropari, Principal Director, Health & Family Welfare Department chu khuallian ah hman a ni.

Doctors' Day programme Aizawl a thusawitu Principal Director Dr.K.Ropari chuan Doctor te chu mipui rawngbawltu an nihna te leh an pawimawhna te hre thar leh turin a fuih bakah an hmalakna kawng hrang hranga hmasawnna tur lai te a kawh hmuh a. Hemi ni pual hian Consumer protection Act leh TB programme chungchangah te zirhona buatsaih a nih bakah Mizoram hmun hrang hranga Doctor-ten thisen unit 50 an pe a. Chawhnu programme Aijal Club a hman takah hian Dr. B.D. Chakma, Minister, Dr. K. Beichhua, MLA leh Dr. Lalrozama, IAS te hnenah chawimawina hlan a ni. Aizawl khawpui ang bawkin Lunglei, Kolasib, Lawngtlai, Champhai, Serchhip, Saiha leh Mamit ah te a remchan dan anga programme hman a ni bawk.