Vawiin khan YMA Sub-Hqrs Hall, Lunglei-ah ni 2 awh tur NPPCD, Directorate of Hospital & Medical Education, Mizoram buatsaihin ‘Training of ASHA under Lunglei District on National Programme for Prevention and Control of Deafness’ neih tan a ni a. Hawnna inkhawm hi Dr. Eric Zomawia, State Nodal Officer NCD-in kaihruaiin Dr.VLMS Dawngliana, Chief Medical Officer, Lunglei chuan Training a hawng.

CMO Dr.VLMS Dawngliana chuan thusawiin ASHA-te chu zirtirtu an ni a, inenkawl dan tha an zir ang ang chu mipui vantlang hnenah an zirtir leh chhawng tur a ni a, chutiang bawkin beng ri hriatna thalo enkawl dan leh inven dan an zir tur pawh bel turin a duh thu a sawi a. Mipui te hrilhhriata zirtirna pek hi rawngbawlna ropui tak a ni tiin Dr.VLMS Dawngliana chuan ASHA Volunteers te chu theihtawp chhuah zel turin a chah.

Dr.Lalthanmawii Khalthang, Consultant, NPPCD-in he programme thil tum leh hmalakna tarlangin bengchhet, beng ri hriatna tha loten ri an hriat tir leh theih nan leh hemi kawnga inven dan chungchanga inzirtirna hi a tum ber a ni, a ti a. WHO chhutdanin khawvelah bengngawng maktaduai 278 an awm a, India ramah Maktaduai 63 an awm bawk a, chung zingah naupang kum 14 hnuai lam an tam hle a ni. Bengngawngte hi zaa 50% chu zaia tihdam theih a ni a, India ramah inenkawlna hi a la chau hle avangin Ministry of Health and Family Welfare-in he programme hi kum 2006-ah State 10 leh UT 1-ah a hmang tan a. Mizoram-ah 2014 atang khan kumtin hman a ni ve ta a ni, a ti. He programme chuan kum 2017 March thla hma ngeiin zaa 25% vel tala beng lama harsatna nei tih tlem a tum a ni. Kum 2014-2015 chhungin Medical Officer, ENT Surgeon, Staff Nurse leh Health Worker te hnenah Training pek an ni vek tawh a ni, a ti bawk.

Dr. Eric Zomawia, State Nodal Officer, NCD-in thuhma sawiin he training hi Mizoram-ah ASHA tan a vawikhatna a ni a. Beng hriatna tha lo hmalatu programme a ni a. District pathum Aizawk 'E', Aizawl 'W' leh Lunglei-ah chauh kalpui rih a ni a, inentirna khawl Lunglei-ah bun tura hmalak mek a ni, a ti.

Ni 2 awh tur he Training programme chhung hian Dr.R.Lalsanglura, ENT Surgeon, NPPCD, District Hospital, Lunglei; Dr. R.Zodingliana, ENT Surgeon, District Hospital, Lunglei leh Zothanmawii Chhangte, Audiometric Assistant, District Hospital, Lunglei ten zirtirna an pe dawn a ni.