Khawvel pumah July ni 11 (Zirtawpni) kalta khan ‘World Population Day’ hman a ni a, hemi Ni pualin India Sorkar Laipui chuan rampumah July ni 11-24, 2015 chhung hi ‘Population Stabilisation Fortnight’ atana hman tur a tih angin, vawiin khan Lunglei-ah pawh Health Deaprtment buatsahin ‘World Population Day-cum-Fortnight Awareness’ hman a ni a. Lunglei DC’s Conference Hall-ah a hawnna neihah CMO Lunglei Dr.VLMS Dawngliana chuan inkhawm kaihhruaiin, Addl DC Pu Rothuama chu Khuallian a ni.

Khuallian Addl DC Pu Rothuama chuan khawvel hmasawn zelah mihring an pung chak zel a; ei leh in bakah hriselna kawngah hmasawn zel a nih angin mimal damchhung (individual lifespan) pawh a rei tulh tulh a, chumi rual chuan khawvela mihring mamawh boruak, tui leh ei/in tur leh thildang (natural resources) a pung chuang si lova, chuvangin mihring pundan ven (population control) a pawimawh ta a ni, a ti bawk. Kumdangah World Population Day thupuiah mipuite hrilhriatna kawnga thu pawimawh tak tak hman thin a ni a, entir nan : ‘Fa i enkawl zo tawk nei rawh’ tih ang te, nupa insiamte tan sorkarin incentive cash-te pawh a sem thin bawk a, kawng hrang hrang hmangin sorkarin India ram mihring pung chak lutuk ven nan hma a la tawh thin a; heng hmalaknate hlawhtlinna erawh mipuite chungah a innghat thui viau a ni, a ti.

Chief Medical officer, Lunglei Dr VLMS Dawngliana chuan mipuite hriselna kawnga an department-in theihtawp a chhuah zel a, a bik takin thingtlang khuaah te VC, YMA, MUP leh MHIP ten department hmalakna an thlawp that thin avangin hlawhtlinna nasa tak kan hmu zel a ni tiin lawmthu a sawi a. Nu leh pa hrisel loh chuan chhungkua hrisel leh hlim a awm thei loh avangin kumina thupuiin a zirtir angin kum 3 danah chauh fa neih hi a him a ni, a ti.

Dr.Lalparliana, SMO, Lunglei chuan World Population Day 2015 Thupui sawizauna hun hmangin khawvel pumah India chu mihring tluklehdingawn 1.28 awmna niin China dawtah mihring tamna ber ram a ni a, khawvela mihring 6 zelah 1 chu India mi a ni tih a sawi a. Kumin Thupui chuan fa nei tlem ngawr ngawr (family planning) lam a kawk loh thu sawiin Dr.Lalparliani chuan ‘planned family’ - kan eizawnna mila fa neih leh chhungkuain a zawh tur tawk chinah fa neih tawh loh lam a tum zawk thu a sawi a. Nu hrisel tha, ei tha leh hahdam tha chuan nau hrisel an nei thin a, chhungkua an enkawl tha theihin an tihlim thei bawk a. Nu chak lo, nau nei zing lutukte chu nauchhiat an awl bakah naute hrisel an nei thei lova, chhungkua tan pawh phurrit leh harsatna a tam phah thin a ni, a ti a. Kum kalta (2013-2014) chhung khan Lunglei District chhungah damdawi(oral pill) hmanga indang 577 a awm a, Condom hmang 283, Copper-T hmanga indang 308 leh inzai (tubectomy) 214 awm thu sawiin Dr.Lalparliani chuan Mizote zingah condom hman hi tun aia uar a that zawk thu a sawi a, nupa inkarah pawh nau pai palh bakah hri tha lo inkaichhawn lakah invenna tha ber a ni, a ti bawk.

World Population Day hi kum 1987 atang khan UNO ruahmannain khawvel pumah hman tan a ni a. Khawvel mihring chen zat pung chak lutuk tur laka inven leh inzirtir nan he Ni hi hman thin a ni a, Mizoramah pawh kum 5 kalta atang khan kumtin he Ni hi man thin a ni. Census 2011-in a tarlan danin kum 10 chhung (2001-2011) chhunga kawng hrang hranga Mizoram hmel danglam dan hetiang hi a ni :

Population :-

2001 - 8,88,573 (gender ratio : 938 females/1000 males)

2011 - 10,97,206 (gender ratio : 976 females/1000 males)

Literacy :-

2001 - mipa 92.53%, hmeichhia 86.75%

2011 - mipa 93.35%, hmeichhia 86.72%

Population density :-

2001 - 42 per sqkm

2011 - 52 per sqkm

Rural-Urban population (as in 2011) :-

Rural population : 47.89%

Urban population : 52.11%

Vawiin 'World Population Day' inkhawm hmannaah Health Department-a thawkte bakah district officials te, Nursing School Principal, staff leh zirlai te, MJA Lunglei bakah tlawmngai pawl YMA, MUP, MHIP aiawhte an tel a. DI&PRO Lunglei Pi Mina Zoliani-in lawmthu sawina hun hmangin hun a khar a ni.