Vawiin khan Champhai District Level Mega Mock Drill chu Sorkar laipui a National Disaster Management Authority atanga Senior Consultant (NDRF) Pu Shivajee Singh endikna hnuaiah hlawhtling taka zawh fel a ni a. He Mock Drill-ah hian lirnghing magnitude 7 avanga Champhai hmun hrang hranga chhiatna thlengah insaseng dan leh chhanchhuah hna thawh dan lem chan a ni.

Pu Shivaji Singh chuan drill neih hma hian Circuit House Conference Hall-ah Disaster Mangement chungchang leh hmalak dan tur zirtirna a pe a. Mock Drill zawh veleh site observer ten report tawi pe in, hmasawn ngaihna hrang hrangte Central Observer ho hian sawiho leh a ni. Pu Shivajee Singh chuan Champhaiah Mega Mock Drill neih vawikhatna ni mahse chanvo hrang hrang chelhtuten an thawk tha a tih thu sawiin, mipuiten inpuahchahna tha zawk leh nachang an hriat theih nan zirtirna pek kawngah tan lak zel a pawimawh a tih thu a sawi a. Chhiatnikhua a hmalatu tha tak ni thei tlawmngai pawl tha tho tak YMA an awm chu Mizoram vanneihna a nih thu Pu Shivajee Singh chuan a sawi a. Champhai chu Aizawl atang a hlat avangin chhiatrupna thlen thulah tanpuina lo thlen mai theih loh hun tawng ta se, inpuahchahna tha neih chu a pawimawh thu a sawi bawk.

Vawiin Mock Drill-ah hian Staging Area (Circuit House) atangin Incident Commander a ruat Pu CC Lalchuangkima, Project Director, DRDA chuan chanvo changtu hrang hrangte hna tuk sakin, hmalak dan tur a rel a. Chhiatna thlenna hmun tinah Site Incident Commander ruat theuh an ni a. Mock Drill-ah hian chhiatna thlenna hmuna ruat te chu CHANEM building, Govt. GM Hr. Sec. School, Civil Hospital, Kanan leiminna hmun leh IB veng atanga Dawrkai Kawn panna kawng te a ni a. Police, Fire & Emergency Services, PWD, P&ED, PHED, District Hospital, SYS, Vengthlang VC leh YMA te bakah Khawzawl atanga lo kal SDRF team ten an chanvo theuh an thawk a. Adventure Club ten inchhawng sang atanga hliam tuar lak thlak dan CHANEM building-ah an entir a, GM Hr. Sec. School-ah Makeshift Hospital siam a ni bawk. Heng chhiatna hmun hrangah hian mawhphurhna changtuten an kalpui dan endiktu Observer ruat an ni.

Attachment

  • Loading attachment...