Vawiin khan Association for Voluntary Blood Donation (AVBD) chuan I&PR Auditorium ah YMA Branch hrang hrang te tan ‘Training of Blood Donor Motivators’ a buatsaih a. Training hawnna inkhawm hi AVBD Vice-President Dr.P.L.Ramliana’n a kaihruai a, AVBD General Secretary Pu C.Lalnunema’n an pawl hmalakna chungchang report a pe bawk.

Training hawnnaah CYMA Treasurer Pu R.Lalngheta chuan Blood Donation-ah hian YMA te inthiar fihlim a rem lova, nasa zawkin mahni hmun theuhvah tan lak a ngai a ni tiin YMA member kalkhawmte a fuih a. Kum 2011-2012 chhunga Voluntary Donation 20765 Unit atanga YMA te pek belhkhawm chu 3442 Unit (16.57%) lai a tling a ni. YMA member kum 18-66 inkar zawng zawng zingah zaa 20% chauh pawh hian mar patin pe thei sela chuan Mizorama thisen mamawh zawng zawng hi Voluntary Donation hmangin harsa lutuk lovin ngah theih a ni.

Association for Voluntary Blood Donation (AVBD) hi May 10, 1991 khan din a ni a, Founder President chu Dr.R.Tlangkunga a ni. AVBD thil tum ber chu Blood Bank hrang hranga thisen thianghlim tam tak dah khawm tura tan lak a ni a. Mizorama thisen pek zawng zawng zaa za Voluntary Donation nih tir hi an tum ber a ni. Hemi atan hian Motivation Campaign te, Workshop/Training te, Blood Donation camp te an huaihawt thin a. AVBD hian Blood Donor Motivators Training hi tum 6 a buatsaih tawh a, YMA puala training hi an buatsaih vawi khatna a ni.