Vawiin chawhnu khan I&PR Auditorium-ah Mizoram Films Development Society (MFDS) leh Information & Public Relations Department tangkawp buatsaih Ni nga (5) awh tur ‘Training on Acting Skill Development’ hawnna hun hman a ni a. Planning & Programme Implementation Secretary Dr. C. Vanlalramsanga, IES chu Khuallian a ni.

Dr. C. Vanlalramsanga chuan hetiang training hlu tak buatsaih a ni chu lawmawm a tih thu a sawi a. Mizoram Films Development Society chuan theatre awm mumal lo chunga hlawhtlinna hrang hrang an nei tawh chu entawntlak a tih thu a sawi a. Film hi mipui hruaikhawmtu tha tak a ni tiin mihring nunphung thlengin nghawng thui tak a tha lam emaw chhe lam zawngin a nei thei a ni, a ti a. Film changtute pawimawhna tarlangin film hlawhtlinna chu a changtute mawhphurna lian tak a nih thu sawiin, thiamna (skill) tak tak neih a ngaih thu a sawi a. Film khawvelah hmasawnna hmuh zel a beiseiawm thu tarlangin Mizoram-a film siam chhuahahte pawh hian kan ram mawina kan hmang tangkai thei a ni, a ti a. Film Industry chu khawvel mithmuha Mizote phochhuaktu a ni thei a ni tiin training hlawhtling tak nei turin kalkhawmte chu duhsakna a hlan nghal bawk a ni.

I&PR Joint Director leh Films Development Nodal Officer ni bawk Pi Lallianpuii chuan thu sawiin training chu Mizoram film khawvela bung thar kaina a ni, a ti a. Film hi hnam ziarang phochhuahna hmanrua tha tak a ni tiin thalaite tan hna siam theitu a ni, a ti a. Film chu mi chi tin reng  tel theihna a ni tiin film culture tha nei turin tan lak a ngai a ni, a ti a. Film khawvelah  hmasawnna tur tam tak  awmin  hmathlir pawh a en thu a sawi bawk a ni.

Training hawnna hi I&PR Director Pi Lalnithangi chuan kaihruaiin kalkhawmte lawmna thu a sawi a. MFDS Vice President Pu Lalawmpuia Khiangte atangin thusawi ngaihthlak  niin MFDS President Pu C. Hmingthangvunga chuan lawmthu sawina in a khar a. Tun tuma training hi a vawi 3-na a ni.