Vawiin chawhma dar 11:00 khan Lunglei Saikuti Hall ah Lunglei District Village Council member thlan thar te pualin Training on Village Council Acts. and 13th Finance Commission on Account Maintanance 2011-2012 chu Pu V.Sapchhunga, IAS, Lunglei Bawrhsap in a hawng.

Pu V. Sapchhunga chuan VC hi mipui aiawh tura mipuite thlan an nih avangin Democracy lungphum pawimawh tak an ni a, chuvangin VC ten an dinhmun hi an hriat chian a ngai a ni a ti. Rorelna dik lo avangin District Administration thleng in harsat na a awm phah thin a ni a ti a.

MGNREGA chungchang sawiin sawrkar kalphung pel a hnathawh a that loh thu leh, hnathawk mang lova pawisa insem chu dan kalh a ni a ti. Material Component ah pawh mipui vantlang in a kan chhawr mang loh Marketshed tam ta lutuk hi a ni a ti. Chhiatrupna laka kan inven nan leh hma lak nan 13th Finance Commission in sum min pe a, zangnadawmna nilovin tanpuina a ni a, tanpuina kan dawn te hi hralh ruk ching kan awm hi a vanduaithlak a ni a ti. VC thar te hi chuan thil thalo te hi i ngaihtuah lovang u a ti bawk. Kan hnam dan kan hmanlai mek te hi a takin kan hriat a that thu a sawi a, kut hnathawktuten hma an sawn theih nan sawrkar in NLUP a sem hi ngai pawimawh a ti hlawhtling theuh turin kalkhawm te a chah a ni. Sawrkar duhdan anga hna kan thawh chuan kan district in hma a sawn ngei ang a ti.

DC hian Lunglei Dist. Village Council Telephone Directory 2012 a tlangzarh nghal. VC 138 atangin VC member 437 ten Training an nei a ni.