Transport Minister Pu TJ Lalnuntluanga chuan  vawiin khan Mizoram Transport Worker’s Association General Assembly vawi 30-na Transport Conference Hall, Chaltlangah a hmangpui.

Pu TJ Lalnuntluanga chuan Mizoram State Transport Bus service ti changtlung lehzual tura hma lak mek a nih thu sawiin Inter District mai ni lo, ram thenawm - Tahan, Churachandpur leh Zampui tlangdung thlenga service dan tur ngaihtuah tum a ni, a ti a, Road Transport Service mai bakah Inland water Transport System changtlung tak din tura hmalak tum a ni, a ti. Bus neihsa tihpun te, a hlui thlak te, route thar siam belh leh bus thar lei te tul a tih thu a sawi a. Chak zawka hna an thawh theih nan post ruak hnawhkhah dan tur pawh ngaihtuah tul a tih thu Minsiter hian a sawi bawk.  Transport Minister chuan mipui ngheng hnai bertu department an nih angin thawktute chu mipuite innghah ngamna ni zel tur leh taima leh rinawm taka hna thawk turin a fuih a. Online system kaltlanga hna thawh a tul tawh avangin thawktute chu a tul dan ang zela intuaihriam tur leh tha thlah lova ke pen turin Pu TJ Lalnuntluanga chuan a fuih a ni.

Lirthei pung nasa chu hmasawnna rah a nih rualin harsatna tam tak thlentu a ni thei tiin lirtheia che sual an pung a, Traffic jam a nasa a, heng harsatna chinfel dan ngaih tuah hi sawrkarin a ngai pawimawh takzet a ni, Transport Minister a ti a. Two wheeler a pung chak ber a, lirthei accident record-ah pawh a sang ber an ni bawk tiin hei hi a chhan nia lang chu khalh thiam hmasa lova lei a, khawpui chhungah, mipui zinga khalh zir chawp an tam vang nia lan thu a sawi a. Hemi pumpelh nan Driving License nei hmasa lova two wheeler lei theih lohna tur ruahmanna siam tum a nih thu a sawi. Accident avanga thihna leh piansualna tih bova a awm theih nan Supreme Court of India in direction a pek ang taka din, State Road Safety Council pawh chak taka kalpui a tum thu leh UNO in Decade of Action for Road Safety 2010-2020 a lo puan tawh bawhzuia Mizoram sawrkarin kum 2020 ah accident avanga thihna thleng thin za a sawmnga a tihhniam a lo intiam tawhna chu chak taka bawhzui tum a nih thu Transport Minister Pu TJ Lalnuntluanga chuan a sawi bawk.

Programme hi MTWA President Pu C.Lalthlengliana’n a kaihruai a. Pu K. Lalrinmawia’n Secretary report a pe. He hunah hian Transport Director Pu Krishna Mohan Uppu chu Khual Zahawm a ni.