1859/2022-2023
Kolasib dated 8th September 2022: Vawiin khan ‘Transforming Literacy Learning Spaces’ tih thupui hmangin Parish Hall, Venglai, Kolasibah ‘International Literacy Day 2022’ hman a ni a. Pu John LT Sanga, Deputy Commissioner, Kolasib chu khuallian niin Pu Lalthanzama, Additional Director, School Education Department chu khual zahawm a ni a. Pu P.C.Lalngaizuala, District Education Officer chuan hun kaihruaiin Kolasib district chhunga sawrkar department hrang hrang hotute, zirtirtute, NGO hruaitute leh zirlai naupangte an tel a ni.

Khuallian Pu John LT Sanga, Deputy Commissioner chuan ziak leh chhiar thiamna chu finna tih pun nana hmanraw pawimawh hmasa ber a nih thu leh finna chu mihring zahawmna tipungtu leh humhalhtu a nih thu a sawi a. Ziak leh chhiar thiam satliah a duhtawk mai lovin mahni, chhungkua, khawtlang leh ram tih hmasawnna turin finna leh thiamna nasa zawk haichhuah nana hman a pawimawh thu a sawi. Ziak leh chhiar thiamna chuan atna, mualphona, harsatna leh retheihna ata tal chhuah nana thil tangkai tak a nih thu Pu John LT Sanga chuan tarlangin mahni inrintawkna min petu leh hmasawn nana thil pawimawh hmasa berte zing ami a nih thu a sawi. Ziak leh chhiar thiam lo tan nitin nunphung pangai zawh a harsat thu sawiin ziak leh chhiar chu zirna in atang chauh a zir tur a nih loh thu leh hmun leh hun remchang apiang zirna atan a hman thiam a tul thu a sawi a. Zirna lam a hmasawnna a awm theih nana sawrkar hmalakna hrang hrangte tarlangin ziak leh chhiar thiam tamna ber State ni tur a tan lak thar bakah thiamna hman tlak neih tum theuh turin zirlaite leh kalkhawmte a chah bawk a ni.

Pu Lalthanzama, Additional Director, School Education Department chuan ziak leh chhiar thiamna avanga hmasawnna chak zawk a thlen dan te leh mihring khawsak phung a changkanna a thlen dan te a sawi a. Pi Ng. Fanchun, Deputy Director, Adult Education pawhin ziak leh chhiar thiam pawimawhna leh Puitling ziak leh chhiar thiam lo zirtirna kawnga hmalaknate tarlangin kumin chhung hian Kolasib district chhunga puitling 550-te ziak leh chhiar thiam tir tum a hmalak mek a nih thu a sawi bawk a ni.

Vawiin International Literacy Day, 2022 pual a hun hmanna ah hian Pi Lalmawii, Kum 73, Bukvannei leh Pi Lalhlimpuii, Kum 58, Bairabi khua ten an puitlin hnu a Adult Education hmalakna hnuai a ziak leh chhiar thiam tur a zirna an kalpui dan tarlanna hun an hmang a. NGO hrang hrang hruaituten thusawina hun hmangin International Literacy Day, 2022 pual a Pu Lalchhandama Ralte, Minister of State, School Education Department thuchah ngaihthlak a ni bawk.

Attachment

  • Loading attachment...