1422/2023-2024

1. Road Tax, Passenger Tax, Goods Tax, Fitness Fee, Permit Fee te a hun taka pek chuan phurrit a ni lova, a hun taka pek loh erawh chuan penalty pek tel a ngaih thin avangin pawisa tam tak sen a lo ngai ta thin a ni.

2. Covid hripui len vanglai pawh khan awmna hmun avang te, chhungkaw harsatnate avangin, Mizoram sorkarin mipuite dinhmun ngun taka ngaihtuahin a hun taka chhiah pe theilo ten a, penalty nen a pek an ngaih thin chu sorkarin lirthei neitute harsatna hrethiamin Mizoram Sorkar chuan ‘khawngaihna hun’ (grace period) hi 1st February, 2020 - 30th October, 2021 thleng a lo hawng tawh bawk a ni.

3. Hetianga khawngaihna hun hawng tur hian process thui tak zawh a ngai thin a. Khawngaihna hun (grace period) hawng tur pawh hian Transport Department pawhin hmalak tur tam tak a nei a. Tin, Finance Department pawmpuina lak phawt a ngai thin a ni. Chumi hnuah VAHAN leh SARATHI Software siamfel turin NIC, Delhi-ah thawn leh a ngai thin a ni.

4. Tun dinhmunah hian Mizoram pumah lirthei register awm zat chu 2,91,883 (as on 31 July, 2023) a ni a. Heng zingah hian document nung lo, chhiah ba zat chu 89,225 zet a ni a, Mizoram pumah lirthei register zawng zawng atang a 30 % zet chu document nung lo, chhiah ba an nei tihna a nih chu. Tin, tunah hian hian Driving Licence 4,83,312 zet a awm a, heng zinga engemaw zat hi renew ngai a ni bawk a ni.

5. Heti zat chhiah bat hi pek vek ni se, Mizoram Sorkarin a hmasawnna hna engemaw zat a kalpui thei dawn a ni. Tin, A.G. Office atanga Auditor ten lirthei neitute chhiah pek loh avanga Transport Department-in Audit Para an neih thin te hi a bo vek ang a. A lawmawm hle dawn a ni.

6. Chhiah pek loh avanga lirthei document thite leh Driving Licence nung lo chunga lirthei khalhte hi danin a khap tlat bakah a him lo em em a. Accident tawh palhin Insurance policy la dam mahse, Accident claim a theih loh a ni. Hetiang avang hian mi tam takin harsatna an tawk mek a ni.

7. Hetiang harsatna awm thei hrang hrangte hi hre rengin Mizoram sorkar chuan hma a la a. Chief Minister zahawm tak Pu Zoramthanga chuan lirthei neitute leh a khalhtute harsatna tawh mekte hrethiamin December ni 31, 2023 thleng ‘khawngaihna hun (grace period)’ hawn anih theihna atan a phalsak a. NIC lamin software an siam fel veleh hman tan nghal tur a ni. (Ni 4 August, 2023 khan NIC Delhi-ah Transport Department chuan thawn thla tawhin, tunkar chhung chuan an peih hman beisei)

8. Hetiang hun hi hawn zen zen chi a ni lova, engtikah nge hawn leh anih ang tih a hriat lova. Chuvangin, Driving Licence thi kawl emaw lirthei document fel lo kawl an awm anih chuan, he hun remchang hi hman tangkai ngei sela, late fee/penalty pe lovin Driving Licence/Document thite tinung ngei turin Transport Department chuan mipuite a sawm a ni.