1421/2023-2024

Darlawn, 9th August, 2023 : Rural Development Minister Pu Lalruatkima chuan vawiin khan Darlawn RD Complex-ah Darlawn BDO office sak thar a hawng a. Tuivawl bialtu MLA, School Education Minister ni bawk Pu Lalchhandama Ralte chuan he hun hi a hmanpui a, Darlawn Venghluna cheng nuai 720 senga sak tur Multipurpose Hall lungphum a phum thung a ni.

Hawnna inkhawm BDO conference hall a buatsaihah khuallian Pu Lalruatkima chuan thu sawiin tun sawrkar hun kal lai mekah hian hmar tlangdungin hma an sawn theihnan nasa takin hna kan thawk a, tunah chuan Mizoram hmun dangte ang bawkin ke kan chhep rual thei ta hi a lawmawm takzet a ni, a ti a. RD department in hma an lak dan chi hrang hrangte tarlangin chung zinga pakhat Darlawn BDO office building hlui tawh tak chu a tharin kan han thlei ta hi a lawmawm takzet a, hei hian thawktute leh anmahni dawr thintute tan phurna leh thathona pe thatlr lehzual turin duhsakna a hlan a, mipuitre tana malsawmna thlentu, Darlawn RD block tana malsawmna leh hlimna thlentu ni turin thawktute pawh inpekna nen theihtawp chhuah turin a chah a ni.

Pu Ruatkima chuan Manipur a buaina namen lo thleng chu pawi a tih thu sawiin, kan unaute chunga harsatna rapthlak tak lo thleng hian kan rilru a ti na takzet a, kan unaute hian min mamawhnaah kan phatsan ngai dawn lo a ni a ti a. Lok Sabha a Monsoon Session neih mekah pawh Manipur a buaina thleng mek avanga Sawrkar rintawk lohna (no-confidence motion) eptuten an put luh chu vawiin lam hian sawiho a ni dawn a, hetah hian Mizoram Sawrkar chuan dinna nghet leh ngaihdan mumal tak a neih avangin Mizoram MP pawh he sawrkar rin tawk lohna sawihona ah hian tel ngei tura tih a ni, a ti a. Manipur lama Zo-hnahthlak ten harsatna an tawh hre chung leh an tawrhna hi a tawmpui tlat a, sawrkar laipui rorel dan chu tha a tih loh avangin, he Sawrkar rin tawk lohna (no-confidence motion) hi Mizoram Sawrkar chuan a thlawp dawn a, vote pawh sawrkar rintawk lohna lamah hian thlak ngei a tum a ni, a ti bawk.

Pu Ruatkima chuan tunhnaia kan chhehvela kan unaute harsatna tawh chi hrang hrang hian zohnahthlak hnam hrang hrangte min tithangharh thar leh ta niin a lang a, duh vang reng ni lova thendarh tawk kan pi leh pute hrehawmna leh tahna kha keini thangtharte hian kan thawidam a hun ta a, ram chuan ri nei mahse hnam leh chhungkuain ri a nei ve thei lo, chuvangin kan unaute tahna hi kan tahna a nih avangin an lamah kan tang tlat a, Mizorama chengte pawhin an tana innghah ngamna kan nih zel a ngai a, inpui an ngaih em em leh ngaihsak em emtu kan ni reng dawn a ni a ti.

Khualzahawm Pu Lalchhandama Ralte chuan a bial chhungah BDO office building thar tha tak an nei ta chu lawmawm a tih thu a sawi a, a bik takin RD Minister Pu Lalruatkima chungah lawmthu a sawi bawk a ni. RD department kaltlanga Tuivawl biala hna tam tak an thawh sak avanga hma an sawnna chi hrang hrang tarlangin RD officer leh staff zawng zawng chungah lawmthu a sawi bawk a ni.

Pu Chhandama chuan sawrkar term change chhung vel chu hripui leng vangin hna kan thawk thei lova, hripui a reh hnuah pawh a nghawng kan la tuar zel a, heti chung hian hmar tlangdung, "Hmar thimpui zangkhaw bungbut hnan" an tih thin hi Mizoram sawrkarin min ngaihsak a, thil tha tam tak min tihsak hi kan lawm takzet a ni a ti a. Hmar tlangdung, a bial chhunga hmasawnna hnathawh kal lai mek leh ruahmanna awm mekte tarlangin, "Hmar thimpui, zangkhaw bungbut hnan" an tih thin hi Mizoram entu, Mizoram innghahna leh Zoram kawtchhuah thar ni thei turin tan kan la zel dawn a, hlawhtlinna hmu tur hian awmze neiin ke kan pen a ni, a ti.

Darlawn BDO office sak thar hi MGNERGS leh MzSRLM tangkawpin cheng nuai 161.64 senga sak a ni a. A project hming hi "Construction of BDO office at Darlawn" a ni a, BDO, Darlawn RD Block hi implementing agency a ni. Thla 15 (May ni 9, 2022 - July ni 31, 2023) chhunga zawh a ni. RD department engineer ten IS Code for Seismic Zone-V specifications anga an design a ni a, concrete structure atan hian IS Grade 20 (M-20) hman a ni a, Steel Reinforcement Design & bar bending zawng zawng hi IS 456 Design Specifications anga siam a ni.

BDO office building thar hi chhawng li a sak a ni a, basement hi 105 sqm niin, ground floor hi 175 sqm, first floor hi 175, second floor hi 203 sqm a ni.

Basement ah hian office canteen leh chowkider quarters a awm a, ground floor ah officer room 1, staff cell 3 leh inthiarna a awm a, first floor ah hian officer room 2, staff cell 3 leh inthiarna awmin second floor ah hian conference hall-cum-training centre, mi 108 len theihna bakah inthiarna a awm thung a ni.

Office chungah hian tui dahkhawlna tur sintex 3 (litre 2000 theuh) dah a ni a. Office thar hi tui leh electric connection mumal taka thuam a ni.

School Education Minister Pu Lalchhandama Ralte-in lungphum a phum tak Darlawn Venghluna Multipurpose Hall sak tur atan hian cheng nuai 720 ruahman a ni a. A project hming hi "Construction Multipurpose Hall at Darlawn" a ni a, a satu contractor atan hian Fredy Vanlalngila, Dinthar-I, Aizawl thlan a ni. Thla 24 (August ni 12, 2023 - August ni 12, 2025) chhunga sak zawh tura ruahmam a ni. Multipurpose Hall hi chhawng 3 a sak tur a ni a, ground floor hi 482.85 sqm, first floor hi 819.23 sqm, second floor hi 216.31 sqm a ni a. A vaia a zau zawng hi 1518.39 sqm a ni.

Ground floor ah hian Table Tennis room, Combat games room, Public gym, Fair Price Shop, NGO office, Canteen leh toilet dah a ni ang a, first floor ah hian Badminton court 2, Meeting room, Stage with green room, Store, sound control room leh toilet dah tur niin, second floor Multi Utility room leh store a awm ang! Underground RCC tanky tui litre 45,000 dawng sak a ni bawk ang.

Vawiin inkhawm hi Pu Irene Zohlimpuii Chongthu, Additional Secretary, Rural Development department in a kaihruai a, Pu Zoremthara Ralte, Deputy Secretary, Rural Development department in BDO office technical report a pe a, Er. C. Lalenkawla, Sr. Executive Engineer, Project Division-IV, PWD in Darlawn Venghluna Multipurpose Hall sak tur chungchangah technical report a pe bawk a, Pi Ethel Rothangpuii, Joint Secretary, Rural Development Department in lawmthu sawina hun hmangin a khar a ni.