1420/2023-2024

Aizawl, 9th August 2023: Azadi Ka amrut Mahotsav lawmna kalpui mek kal zelah Governor Dr Hari Babu Kambhampati chuan vawiin khan Durbar Hall, Raj Bhavan-ah Dr.Laltluangliana Khiangte ziah lehkhabu pathum, tawng hrang chi thum – Hindi, English leh Mizo tawng a ziak te chu a tlangzarh. Dr. Laltluangliana Khiangte lehkhabu ziah, vawiina tlangzarh tak te chu Heroes and anti-Heroes(English Version), Mizo Nataak – 2 : Rani Ropuiliani(Hindi Version) leh History of Mizo Literature( Mizo Version) te a ni.

Lehkhabute a tlangzarh hnuah Governor Dr Hari Babu Kambhampati chuan he hun puala pungkhawmte hmaah thu a sawi chhunzawm a. Governor Dr Hari babu Kambhampati chuan vawiina a tlangzarh tak Lehkhabu pathum te chu Lehkhabu satliah ni lovin hnam rohlu a ni tiin a ziaktu chu a fak a. Dr.Laltluangliana Khiangte kutchhuak te enin Mizo literature tana a thawh hlawk piah lamah Mizote chanchin,an huaisenna bakah ram leh hnam chhanna atana an inpekna te India ram hmundanga miten an hriat phah nia a hriat thu a sawi. Governor chuan Lalnu Ropuiliani chanchin atang hian mahni ram leh hnam hmangaihna, mahni hnam chhanna atana nun hlantute te an ropuizia leh kan hlut a pawimawh ziah te a lang chiang em em a ni a ti. Mizo thuziakmite zingah Hindi tawnga Lehkhabu ziak emaw letling an tam loh lain lehkhabu tha tak Hindi tawngin lehlin a ni l eh ta chu thil lawmawm tak a ni tih a sawi bawk.

Full Speech of Governor: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-release-of-three-books-written-by-prof-laltluangliana-khiangte-in-three-languages-at-durbar-hall-raj-bhavan-on-09th-august-2023

Lehkhabu ziaktu, Prof. Laltluangliana Khiangte, Senior Professor, MZU-in lawmthu sawiin lehkhabu tlangzarhna  hun hi tan a ni a. Prof R.Thangvunga(Rtd) in lehkhabu thlirlawkna hun a hmang a. Hemi hnu hian Prof Dibakar Chandra Deka, Vice Chancellor in thu a sawi  leh a. Pu LTL Fela, Chairman & CEO, TiLi chuan lawmthu sawiin  huntawp a khar thung a ni.