1419/2023-2024

Kolasib dated 9th August 2023: Vawiin chawhma khan DC Conference Hall, Kolasibah India ram inpumkhatna tih ngheh zual lehna tur leh ram tan a nunna hlu tak hlan te zahna lantir nana ‘Meri Maati Mera Desh’ buatsaih kalpui tan a nih theih nan Pu John LT Sanga, Deputy Commissioner chuan Campaign hawnna hun a hmang a. Pi Melody Ngurthantluangi, Addl. DC-in hun kaihruaiin Sawrkar office, khawtlang leh tlawmngai pawl harng hrang hruaitute he hun ah hian an tel a ni.

Deputy Commissioner Pu John LT Sanga chuan India ramin zalenna a hmuh kum 75-na lawmna, ‘Azadi ka Amrit Mahotsav’ kal zel ah hmalakna hrang hrang kalpui a nih dan tarlangin a hmawr bawkna ni turin ‘Meri Maati Mera Desh Campaign’ chu sawrkar laipuiin a ruahman thu a sawi a. He campaign hian hmun hrang hrang a India khua leh tui te inpumkhatna tur a hmalakna kalpui bak ah ram tan a nunna hlantute chawimawhna hun buatsaih tur a nih thu a sawi. Pu John LT Sanga chuan ram ropui siam tur chuan a chhung a chengte inkarah inpumkhatna leh inlungrualna tha tak a awm a ngaih thu leh chumi tur chuan ram tan a mi huaisen leh mi inpe te ngaih hlut leh chawimawi nachang hriat a pawimawh thu a sawi bawk a ni.

Pu Lalmuan Puia, Project Director, DRDO chuan ‘Meri Maati Mera Desh Campaign’ chungchang sawi zauna hun hmangin he campaign hian martar-te pual a lungphum, ‘Shilaphalakam’ siam te, ram tan a inpekna tithar leh tur a thutiam lak te, khaw tin a thingtiak 75 phun te leh khaw tin atanga lei lak khawm hmang a Karavya Path hmun a Martar-te Huan,’Amrit Vatika’ siam te a ken tel thu a tarlang a. Heng ruahmanna hrang hrangte hi August ni 9 atanga ni 30 chhung a kalpui hman tur a rel a nih thu a sawi bawk a ni.

Meri Maati Mera Desh Campaign hawnna hun ah hian Maj. (Retd) Carolyne Z Pachuau, District Sainik Welfare & Resettlement Officer chuan lawmthu sawina hun hmangin kalkhawmten ram tan a inpe tur a thutiam,’Panch Pran Pledge’ sawi hona hun an hmang a ni.