No.1712/2020-2021

Aizawl, the 5th June 2020 : Vawiin khan Commissioner & Secretary, Transport Pu K.T. Beicho, IRAS hovin a Pisa ah Transport Department hotute leh SBI Official ten online payment (e-Payment) kalpui turin thawhhona thuthlung MOU an ziak a. MOU ang chuan SBI-in payment gateway an siam ang a, Transport Department leh NIC lamin e-Payment hmang thei turin an software an lo siam rem ve thung ang. He e-Payment hi Transport Department hnuaia DTO Office dawrtute tana tangkai leh him zawk tur a nih avangin chak taka buaipui chhunzawm tur a ni a. Tun atanga rei loteah hian hman theih nghal beisei a ni.

E-Payment hmangtute tan Bank lamah leh Department lamah chawi belh tur (Transaction Charge) a awm dawn lo a, a him tawk hle tura ngaih a ni bawk a, DTO Office dawrtu thenkhat chu a hmun a kal kher ngai loin mahni in lum atangin online hmanga fee leh tax hrang hrangte pek mai theih a ni tawh dawn a ni. SBI e-Payment hi sawrkar Department tan liau liau a duan a ni a. Tax leh fee chi hrang hrang - Learner Licence Fee te, Driving Licence Fee leh Renewal Fee te, Road Tax te, Plying Permit Fee te, Special Road Permit Fee te, Registration of Motor Vehicle Fee te, P & G Tax te leh STA kaihhnawih fee chi hrang hrangte hi pek theih a ni ang.