No.1711/2020-2021

Vawiin chawhnu dar 2:00 khan Divisional Forest Office Lunglei bultumin Hi-Tech Nursery Pukpui-ah World Environment Day 2020 hman a ni a, Pu H. Lalthansanga, President, MJA Lunglei chu khuallian a ni.

He hun hi Pi Lalrammawii Sailo, DFO Lunglei chuan a kaihruai a, Keynote Address hun hmangin, World Environment Day hman tan atanga vawi 46 na a nih thu sawiin, thupui bik neiin he Ni hi hman thin a ni a, kuminah chuan, ' Celebrate Biodiversity / Care for Nature' tih a nih thu a sawi. Kan Environment humhalha venhim leh tih thianghlim hi kan mawhphurhna a ni a, chutih rualin kan bawlhhlawh sawngbawl dan leh kan ei bangnawi seng ho dante hian kan Environment nasa takin a nghawng thei vek a ni, a ti.

India danpui Articke 51 naah Khua leh tui tha kan nihna angin Fundamental Duties mawhphurhna hrang hrang kan nei a, kan lui tui leh nungchate thleng hian kan humhalha kan venhim hi kan tih tur leh mawhphurhna a nih thu a sawi a, kan ramngaw te pawh nasa zawka kan humhalh zel a pawimawh thu a sawi. Hei bakah kan Environment humhalha venhim kawngah Lungleiah pawh Intiamna (Pledge) hmanga buatsaih a nih thu a sawi.

Pu H. Lalthansanga, MJA Lunglei President chuan thu sawiin, World Environment Day kan hman mek lai hian kan ram, a bik takin Mizoram boruak, a thiangin a tha kan tih thin kha kan Environment kan tih chereu nasat avangin chen hrehawm khawp a ni chho tan a, chuvang chuan keimahni tan chauh pawh ni lovin, kan zavai atan kan Environment humhalh tulin a pawimawh a,chuvang chuan mahni hmasial tak pawha kan humhalh hi a ngai a ni, a ti.

Pathian thu a tang pawhin, khawvel zawng zawnga kal a, thilsiam zawng zawng hnena Chanchin Tha hril tura tih kan ni a, he thu hi Kristian te phei chuan engtin nge thilsiam tinreng te hnenah Chanchin Tha chu kan hril theih ang tih ngun taka ngaihtuahin, kan environment humhalha enkawl leh venhim hi an hnena Chanchin Tha kan hril theihna pawimawh tak a ni tih kan hriat thar theuh a pawimawh thu a sawi.

He hunah hian Pu Vanlalzarzoliana, Forest Ranger chuan World Environment Day 2020 pualin thu tiam hun kaihruaiin, kalkhawmten hetiang hian thu an tiam rual a ni.

"Mizoram hi duat tak leh uluk taka enkawl tura Siamtu min pek tih ka pawm a; Thilnung dangte nena cheng ho tur kan nih zia ka hria a; Mihringte hi thilsiam zinga chungnung ber leh enkawltu kan nih angin khawvel chhiat leh thata mawhphurtu kan nih ka pawm a; Ka nunkhawchhuah na'na ka mamawh te ka lakkhawmna kawngah eng thilnung mah tina a, tichereu lo turin tan ka la ang a; Vawiin June ni 5, kum 2020, World Environment Day hian kan chenna leilung leh a chhunga awmte chunga hmangaihna lantir zual turin ka intiam nawn leh a ni."

He hunah hian Pu R. Vanlalmalsawma, R.O Lunglei chuan lawmthu sawina hun hmangin, hemi hnu hian World Environment Day pualin Pu H. Lalthansanga, Khuallian chuan thing a phun nghal a ni.