423/2025-2026
Dated Aizawl the 1st May, 2025 :Vawiin chawhma dar 11:00 khan, Pu Zosangliana, Secretary, Transport Department chuan, Motor Vehicle Enforcement Checkgate, Phunchawng, Aizawl ami chu khuallian niin a hawng.
Hawnna hunah hian khuallian Secretary, Transport Department Pu Zosangliana chuan thusawiin, Transport Department chuan Mizoram chhung hmun hrang hrang: Vairengte, Rengtekawn leh Kanhmun a mite nen, vawiina hawn tak Phunchawng a mi chu a palina tur a nih thu sawiin, vawiina hawn tak chuan Checkgate hmasa Rengtekawn a mi chu a ai a awh tur thu a sawi. Khawvel changkanna in a ken tel lirthei lo pung zel avang te, chumiin a ken tel dan bawhchhiatna pung leh a kaihhnawih chi hrang hrang laka invenna turin Checkgate thar chu Mizoram tan thil chhinchhiah tlak tak a nih dawn thu a sawi a. Hemi lama tangkai tak tur hian, tuna Check Gate hawn turah hian lirthei, a bikin bungraw phur chi ho te'n dan phal chin aia tam (overload) in an phur em tih uluk taka endikna tur weighbridge pawh dah a nih thu sawiin, Check Gate ah hian 24x7 in Transport Department hnuaia Enforcement Staff te an duty dawn a. Anni hian lirthei chi hrang hrang endik hna an thawk dawn tih a tarlang a. dan phal chin aia rit phur te chu hrem theih an ni dawn tih a sawi.
Vawiina MV Enforcement Checkgate hawnna hi Pu Zothangzuala Chhangte, Joint Director (Hqrs) Transport Department chuan kaihruaiin, kalkhawmte lo lawmna thu a sawi a. Er. R. Lalrammawia, Director of Transport Department hnen atangin Technical Report ngaih thlak a ni a. Pu B. Lalchuangkima, D.T.O (R.A) chuan lawmthu sawiin hun hi a khar a ni.
Check Gate a Weighbridge hi sorkar leh M/s Green Hills Infrastructure-te tang dunin an dah a ni a. Anni hian Weighbridge installation bakah, a tehna khawl operate lam an buaipui dawn a ni.
Motor Vehicle Act & Rules ah hian lirthei inkaihhruaina dan chi hrang hrang a awm a. Heng te hi lirthei neitute'n tha taka kan zawm a pawimawh hle a. A bikin, bungraw phur chi lirthei te'n an phurh theih zat aia rit an phur a nih chuan hremna a sang em em a. Rs.20,000 chawi bakah, tonne 1 zelah Rs 2000 chawi tir a hrem theih a ni. Chuvangin, dan tha taka zawm theuh turin Transport Department chuan mipuite a ngen a ni.
