New Delhi a cham mek Transport, Art &Culture leh Printing & Stationery enkawltu Minister Pu P.C.Zoram Sangliana chuan sorkar laipuia Culture Minister Pi Kumari Selja chu a chenna inah karkalta Zirtawpni June 29 khan a kawm a. Mizo Cultural Troupe ten 37th Alnwick International Music Festival Newcastle, United Kingdom-a August ni 4 atanga ni 11, 2012 chhunga neih tur an chhim ve theih dan tur a sawipui. Union Minister Pi Selja-i Secretary Dr G. Anupama Kumar bakah Indian Council for Cultural Relations President Dr.Karan Singh pawh kawmin hemi chungchang hi a sawipui zui a ni.

Pu P.C. Zoram Sangliana hian DoNER Secretary Pu A.S. Lamba pawh July 2 khan a kawm a. Government Press thuamchakna tur sum pekchhuah vawihnihna (2nd Installment) a hun taka pekchhuah a lo tiam a ni.

July 3, Thawhlehni khan Art &Culture Minister hian High Commissioner of the British High Commission, Sir James Bevan KCMG chu New Delhi-a a chenna inah tlawhin Mizo Cultural Troupe ten Newcastle tlawh an tum chungchang a sawipui a. High Commissioner hian theih ang anga tanpui a lo tiam a, troupe member te tana Visa buaipui kawngah pawh a tanpui tur thu a lo hrilh. Pu P.C. Zoram Sangliana sawmna angin nakum Chapchar Kut-a Mizoram rawn tlawh a remti a, Mizoram sorkarin dan anga sawmna a thawn hunah hei hi tihfel a ni ang.

Minister Pu P.C. Zoram Sangliana hian sorkar hna tul te a thawh zawh hnuah vawiin hian New Delhi a chhuahsan ang.

Attachment

  • Loading attachment...