Vawiin chawhnu kha Transport Minister Pu John Rotluangliana chuan ama Office ah Transport Department hotute, Mizoram Pollution Control Board a thawkte leh Police Department hotute a kawm a. Meeting ah hian Mizoram a khua te a lo thiangthlim zawkna tur leh a chhunga chengte an lo hrisel zawk nan Mizoram lirthei awm zawng zawngah pollution control nasa zawka kalpui ni se tiin a rel a. He hmalakna hian lirthei chi hrang hrang atanga meikhu chhuak, mihring hriselna atana pawi thei tih ziawm leh bengchheng siam thintu two-wheeler leh lirthei chi dangte a proton vuah te a huam dawn a ni.

Transport Department in Mizoram a lirthei neitu tan an lirthei khu chhuak te chu test vek tura thupek a chhuah hnu ah test certificate nei an tlem hle tih Meeting ah hian sawichhuah a ni a. Tun dinhmunah Mizoram Pollution Control Board(MPCB) enkawlna hnuaiah Vehicle emission testing centre 4 – New Secretariat Complex, Zemabawk, Bawngkawn leh Ngaizel ah te a awm a. Heng centre 4 record in a tarlan dan chuan Mizoram a lirthei awm zinga emission test tam ber two-wheeler zingah pawh 0.6% chiah in Vehicle emission testing centre ah te hian an lirthei meikhu chhuahte endiktir in ‘pollution under control certificate’ an la a ni. MPCB hotute chuan lirthei lian zingah Sawrkar motor zawng zawng test vek a nih thu sawiin a bak city bus, bungraw phur motor, taxi, private motor leh a dang te chuan Test an ngaipawimawh tawk lo niin a lang an ti. India ram hmundang zawng zawngah vehicle emission Test hi thil tih ngei ngei tur leh test certificate neilo te chu hrem theih an ni vek tawh a. Hei vang hian Mizoram pawna zinchhuahpui tur lirthei tlem a zawngin pollution test hi an rawn pal tlang ve thin niin an sawi a ni.

Vawiin a Transport Minister leh sawrkar thuneitute thukhawm chuan Pollution a ngaihmawhawm thu leh a tihziaawm dan kawng dap a rel a. He hmalakna tichak tur hian a tul anga mipui zirtirna kawng hrang hranga neihpui leh a ni ang a. He committee thutlukna ang chuan August 2014 ral hma in lirthei neitu zawng zawng ten Aizawl khawpui a Vehicle emission testing centre 4 ah te an lirthei te endiktir a‘pollution under control certificate’ an neih a ngai dawn a ni. Test paltlang tawh sawrkar motor zawng zawng te pawh test hun leh tawh dawn avangin test leh vek tur a tih a ni a. Test paltlanglo lirthei te chu ni 7 chhunga siamtha tura hun pek an ni dawn a ni. ‘Pollution under control certificate’ hi test ni atanga chhut in thla 6 a nung ang. MPCB in lirthei pakhat zel ah Vehicle emission test man a bituk chu- two-wheeler ah Rs.50, three-wheeler ah Rs.70, LMV ah Rs.100, MMV ah Rs.120 leh HMV ah Rs.150 te an ni. September thla atangin lirtheite hi endik an ni ang a, ‘pollution under control certificate’ la nei lo manchhuah te chu dan hmanga hrem leh pawisa chawitir an ni dawn a ni. Lirthei a ri bengchheng tak siam thin proton vuah chungchang te pawh meeting ah hian sawi chhuah nghal a ni a. Traffic lam thuneitute chuan hma an lak mek thu sawiin two-wheeler leh four-wheeler engemaw zat man a ni tawh a ni an ti.

Transport Minister hi Pu T.T. Zothansanga, Parliamentary Secretary, Transport, FCS&CA,etc., in a tawiawm a. Meeting ah hian Transport Secretary Pu Hrangtawna, Pu Zorammawia, IGP, Pu R.C.Thanga,Chairman, MPCB, Pu Lallianmawia, SP, Traffic leh mi pawimawh dang te an tel a ni.