Vawiin chawhnu khan Tranpost Minister Pu John Rotluangliana leh Parliamentary Secretary, Transport Department changtu Pu T.T. Zothansanga te kaihhruaiin State Level Road Safety Council member te chuan Road Safety Week hman dan tur rel in Transport Minister Office ah an thukhawm.
Road Safety Week hi February 10, 2014 ah Parliamentary Secretary Pu T.T. Zothansanga’n hawng ang a, February 14, 2014 ah khian a kharna hun Vanapa Hall-ah Transport Minister in a hmanpui ang. Kumin hian Road Safety week hi Aizawl-ah chauh hman a ni dawn a ni.
Meeting kaihruaitu, Transport Minister chuan kawngpui dung hmun him zawk a nih theih nan motor khalhtute leh ke a kal ten mawhphurhna kan nei ve ve a ni a ti. Motor khalh thiam mai a duh tawk lovin Traffic dan hria a zawm ngei turin lirthei khalhtute a chah a. Mipui tamzawk pawh in motor tlan tamna hmun a kawng kan dan te, motor ken dan leh kawngpui sira a kal dan thleng hian kan lo him zawk nan kan thiam a tul takmeuh a ni ati.
Road Safety Council meeting chuan Road Safety Week vawi 25-na hman dan tur chu hetiang hian a rel a. He week chhung hian Aizawl khawpui chhunga High School thlanchhuahte pualin Road Safety chungchangah Quiz hmang a intihsiakna an nei ang a. Aizawl khawpui hmun lun lai deuh ah te mipui zirtirna a remchan dan ang a tawngka leh aurinna hmang a pek tum a ni. Road Safety lampang hawi a Banner te khawpui chhung hmun thenkhat ah te tar a ni ang a, road safety flag pawh kum dang angin zawrh leh a ni ang. Local Cable TV ah te Transport Minister thuchah tihchhuah a ni ang a. Closing Function Vanapa Hall-a neih turah hian Best Taxi Driver, Best Maxi Cab Driver, Best City Bus Driver leh Best Traffic Police thlan chhuahte hnenah Transport Minister’s Award hlan an ni ang.
Meeting-ah hian Transport Secretary Pu C. Lalhmachhuana, Dr. Lalbiakkima, Director, Health & Medical Education, Pu C. Lalrinawma, SE, PWD, Traffic hotute leh ZDU hruaitute an tel a. Road Safety Week chhunga hman tura ruahman, Aizawl Taxi Driver Training pek tum erawh chu hun remchang zawk ah sawn hlat a ni.
