Vawiin khan Transport Minister Pu PC Zoramsangliana chuan Kolasib khaw chhunga VC House pakua (9) BNRGSK building te a hawng a. Heng a hawn takte hi Kolasib khaw chhung veng hrang hrang Saidan Rs. 8,73,000 senna, Hmar Veng Rs. 9,66,000, Tumpui Rs 8,73,000, Venglai Rs 9,66,000,College Veng Rs. 8,73,000, Diakkawn Rs. 9,66,000, New Diakkawn Rs. 8,73,000, Vengthar Rs. 966,000 leh Project veng Rs 8,73,000 senga sakte an ni.

Heng Hall-te hi hawngin Pu PC Zoram Sangliana chuan VC tin ten inel taka rotling tur in sak hna an thawh avanga a lawmthu a sawi a. Sawrkar din tirh phata an thil tum mi retheite khaichhuahna tura NLUP hna an kalpui hnua kut hnathawktu mi harsa tak takten sawrkara an chanvo a taka an thawh theihna tur hmanrua BNRGSK building saka hawn theiha a awm ta chu hlawhtlinna ropui tak nia a hriat thu a sawi a ni. NLUP sum dawn nan te, meeting leh training neih nan te hei hi ala tangkai hle dawn a, VC ten hna in thawh zelnaah langtlang taka thawka sum pawh a nihna tur taka in hman a tul a ni, a ti a ni.

Minister chuan Mizoram-ah sum ringawta intlansiakna a nasa hle a, hei hi kan hnamin kan chhiatpui hle a ni, a ti a. Mitinte a thara ngaihtuahna hmanga sum leh paia in haivur ri ngawt buaipui lo tur leh ram leh hnam tana rotling thil chher chhuak turin a chah a ni. Mizoram-ah hmasawnna kawng hrang hrang in thawh chhoh mek zel a ni a. Tuirial Hydro E Project te, Serlui H Project tepawhin awmzia an nei chho mek a. Sawrkar hmasa khan Tuirial Project tehi Compensation thu avangin lo ti chingpen lo se chuan thui takin awmzia kan nei tawh ngei ang a ti a, Tunah hian Meidum hmuna ONGC hna thawh chuan Gas hmuchhuak tawhin a bak thil tha dang pawh beisei zel ala ni, a ti bawk a ni.

Pi Maria CT. Zuali, Project Director pawhin thu sawiin, tun hmaa Kolasib-a Job Card 20275 awm kha uluk taka check hnuah 17500-ah a tla thla ta a. Hei hian Material Component lamah sum a tipung a, chu chu khawtlang tih hmasawn nana hman zel niin hna thawh pawhin hma a sawn ta hle a ni a ti a. VC te chu rin tlaka thawk tura chahin in hnathawhna kawngah pawh endik hna tun hma aiin kan uluk dawn a ni, a ti a. Chu chu nakina kan District tana la chhenfakawm tur a ni tih in hre dawn nia tiin VC te chu a chah a ni.

Minister hi Pu Lalchungnunga BDO Bilkhawthlir, Pi Lallianpuii DIPRO leh vengtin a VC ten an tawiawm ani.