Sericulture Minister Pu N.K.Chakma chuan vawiin chhun khan Rangvamuala Sericulture Department theihmu huan Mulberry Basic Seed Farm a tlawh a, a hmuna hmalak dan te a enfiah. Minister chuan Basic Seed Farm chu infrastructure (kawngpui leh in sak) lama tihchangtlun tula hriain hmalak nghal a tum thu a sawi. Rangvamuala Basic Seed Farm hi Sericulture Department Farm bulpui ber a ni a, hetah hian Department chuan mulberry silkworm race (chi) hrang hrangte inthlah chhawng chho zel tur chu uluk bikin an enkawl a, pangang chi (silkworm seed) hmunpui pawimawh ber a ni. Heta tang hian Department enkawl - Vairengte, Phullen, Mamit, Seling, Champhai, Serchhip, Thenzawl, Saiha, Hnahthial leh Lunglei Seed Farm te bakah mimal pangang chi khawitute hnenah sem darh a ni thin a ni.

Rangvamuala Basic Seed Farm hi acre 10 -a zau a ni a, Sericulture Promotion Officer hovin thawktu 9 ten an enkawl mek a ni. Basic Seed Farm hi kum 1972 atanga bul lo tan tawh a ni a, vawiin thlengin theihmu kung te hi a la duah tha hle a, Sericulture hi eizawnna kumhlun a nih zia a lang chiang hle a ni. Minister hi Sericulture Director Pu D.Engzanang leh senior officer ten an tawiawm a ni.