Transport Minister Pu P.C. Zoram Sangliana chuan a bial chhung Kolasib constituency-a chhungkaw 40 hnenah inchung chih tur Rangva a pe.

Pu Zoram Sangliana hian Kolasib bial chhunga khaw hrang hrangte nimin khan fangin rangva hi a sem a. Bairabi khua ah chhungkaw 24, Meidum ah chhungkaw 6, Pangbalkawn ah chhungkaw 5 leh Chhimluangah chhungkaw 5 te hnenah inchung chih tur rangva tehi Bundle 4 theuhvin a pe a ni.

Khaw tinah VC kaihhruaina in Rangva semna hun hi hman a ni a. Heng hmunah te hian thu sawiin Pu Ramsanga chuan, Inthlan dawna kan inzawrhna leh kan intiamna (manifesto) bawhzuiin mi rethei inchung rangva chih tur nei lote hnenah rangva kan pe ta hi ka lawm takzet a. Pu Lal Thanhawla hruai sawrkar hian mi rethei pachhiate a ngai pawimawh hle a ni, a ti. Politician te kan tehna tur chu kan thutiamah kan ding em tih hi a ni a. Hemi kawngah hian Pu Hawla leh a hote hi kan thiltihah kan lawm hle a ni, tiin, kan Policy te kan tihlawhtling chauh pawh nilovin kan tlanpel nasa tawh hle a ni, a ti a ni.

Kolasib bial chhunga hmalakna kawng hrang hrang te tarlangin mi rethei in sakna tur tanpuina dawng 210 ten an in an sak zawh tawh thu te, Bus terminal Kolasib a sak tur leh Silchara Inter State Bus Terminal sak a nih dawn thu te a sawi bawk a. Tuna mi retheite dawmkanna tur leh eizawnna ngelnghet an lo neih theih nana sawrkarin NLUP tanpuina a pek chu dik taka hmanga chhungkaw inben bel nana hmang ngei turin mipui te a chah a. Manni chanpual hmang dik lova nawmchen nana hmang te kan awm a nih chuan chung mite tan chuan sum dang beisei theih a nih dawn loh thu leh chu chu Jail bang zut theihna hial a nih theih thu pawh Minister hian a sawi a ni.

Meidum khaw chhunga MGNREGS Material Component 2010- 2011 hnuaia pawisa cheng nuai 8 senga  Lei dawh Pu Ramsanga hian a hawng bawk a. Meidum Anganwadi Centre sak thar, Rs. 1,75,000 /- senna a hawng bawk a. He Centre ah hian naupang 130 lai an awm avanga an chepthu leh Centre dang din an duh thu Meidum VC te chuan an lo thlen a ni. Eirawng bawlna tur gas thuk leh thutthlengsei man tur Rs. 2,000/- Minister hian a pe a ni.

Meidum khaw bul Leilet hmuna Minor Irrigation Deptt. in hna an thawhte Minister hian a endik nghal bawk a ni.

Attachment

  • Loading attachment...