1901/2024-2025

Aizawl 4th September, 2024 : Pu Vanlalhlana, Transport Minister chuan vawiin khan Synod Conference Centre, (Pi Zaii Hall), Sikulpuikawn Aizawl-ah Mizoram Government Drivers' Association te'n Diamond Jubilee an hman chu khuallian niin a hmanpui.

Transport Minister chuan MGDA te'n an kum 60 tlin Diamond Jubilee hial hmang theia an awm chu a lawmpui thu sawiin Driver te intello chuan kalphung tharah pawh sorkar a kal thei lo a ni a ti. Hmasawnna kalzelah lirthei khaltute chu an thiamna te tipung zel tur leh an hriselna ngaipawimawh turin a chah a. Inhna hian kan rama thuthlukna siam thin officials te thlenga a huam vek avang leh nunna hlu tak chu an kut a innghat anihna chen a awm avangin fimkhur taka an mit leh beng te bakah an kut leh ke te hmang thin tur leh an nun uluk hle turin a chah a. Driver te harsatna kan ram kawngchhia pawh theihtawpchhuaha Sorkar chuan thuamthat zel an tum  thu a sawi bawk a ni. 

Minister hian MGDA Diamond Jubilee lawmpui nan hian pawisafai a hlan bakah Aizawl City Bus Owners Assn (ACBOA) leh ZDU (Zoram Drivers Union) te'n lawmpuina thuziak leh pawisafai an hlan bawk a ni.

Pu Lalrinngheta, President, MGDA-in thu a sawi bakah Pu Vanramthanga, MGDA General Secretary chuan report a pe a. MGDA hi Kum 1964 September Ni 4-ah din tan niin General Headquarters bakah Sub Hqrs 10, District hrang hrangah an awm mek a. Tunah hian Member in-register hi 1000 chuang hret an awm mek a ni. Hruaitu hluite hi tun thlengin mi 51 awm tawhin 36 an la dam a, 15 an boral tawh bawk. 

MGDA te hian Diamond Jubilee pual hian hruaitu hlui chawimawina hun an buatsaih bakah Programme zawhah Jubilee puala Lucky Ticket an siam vawrna hun an nei nghal bawk. MGDA-ah hian Sorkar Motor khalh te a duh apiang tan inziah luh theih a ni a. Regular Driver te chu Grade III atanga tanin kum 25 hnuah special grade an thleng thei a ni. 

Diamond Jubilee lawmna hun hi Pu Lalnunzira Colney, Vice President, MGDA chuan kaihruaiin Jubilee lawmna ruai buatsaih a ni bawk.