1900/2024-2025

Lawngtlai the 4th, September 2024 : Vawiin chawhma dar 11 khan Samagra Shiksha, Lawngtlai District bultumin Primary School Zirtirtute hnena 'Tablet ' semna Teachers' Inn, College Veng, Lawngtlaiah neih a ni a. Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan khuallian niin a hmanpui.

Dr. Lorrain Lalpekliana Chinzah chuan zirtirtute chu ram leh hnam tana an thawhna leh inpeknaah zahna chibai a buk tih a sawi a. Zirtirtu tha leh fel tak tak karah felhlel deuh an awm thin chu veiawm a tih thu tarlangin mahni hnaa rinawm leh taima taka  thawk zel turin kalkhawmte a chah a. Zirtirtu  hna dil laiin khawiah pawh awm turin kan intiam thin a, chutih rualin hna  thawh tawh  hnuah post nuam deuha awm kan kherh nghal thin hi chin tha lo tak a ni tiin chutiang rilru chu dahbo a hun tawh hle a ti. Primary  School chu naupangten Zirna In an hmelhriat tanna a ni a, hemi level atanga  thiamna tha tak  pek an nih chuan lak tlak leh hman tlak, khawtlang leh ram tana mi tha takah chherchhuah theih an ni a, Zirna In sang zawkah pawh harsatna an tawk dawn lo a ni, a ti. Zirtirtute chu an hnathawhah hlawh hmuh nan chauha thawk lo tura ngenin, nakin lawka ram leh hnam hruaitu tur an enkawl mek a ni tih hre reng turin a chah.

Khuallian chuan tunlai thiamna sang zelah Internet leh 'online portal'  tam zawk hman a ni tawh a, Teacher' s Resouce Package hnuaia 'Tablet' sem a ni chu lawmawm a tih thu tarlangin, tangkai taka hman a nih ngei a beisei tih a sawi. Zirlai naupangte tana thil pawimawh leh tangkai tak a nih dawn avangin Zirtirtute chu thiam nal taka 'Tablet' hmang thei tura mahni inzir thiam turin a chah a. Dr. Lorrain Lalpekliana Chinzah chuan Lawngtlai khawpuiah ruihhlo chi hrang hrang  hluar hle in, HIV kai tamna ber pawl a nih mek thu tarlangin, tute nge mawhphurtu tih kan inzawhnawn fo a ngai a ti a. Nu leh Pa,  bakah Zirtiruten  mawhphurhna lian tak an nei  tih sawiin,  Zirtirtute chu  naupang enkawlna kawngah ruihhlo ti lo tura zirtirna uar tur leh 'sex education' lam pawh tha hnem ngai zawka inzirtir thin turin a ngen bawk.

Dr. Lorrain Lalpekliana Chinzah chuan Mizoram leh Lawngtlaiah ngei pawh zirtirtu indaihlohna a nasa hle a, zirna in chei that ngai pawh a awm nual tih sawrkarin a hriatpui tih tarlangin, theihtawpa hmalak mek a ni, a ti a. Samagra Shiksha Lawngtlai  hnuaia "Girls' Hostel "  sak turah pawh tender chhuah fel a ni tawh tih a sawi. Mid-day Meal, free text book, free uniform leh  eco-club - samagra hnuaia kalpui thin chu chak zawk leh mumal  tak kalpui zel a tul hle a ti a. Lawngtlai district - a Zirna  In  zawng zawngin hmasawnna thar a hmuh ngei theih nan leh zirna kawnga rahbi thar kai turin zirtirtu zawng zawngten  theihtawp i  chhuah  zel ang u tiin a sawm nghal a ni.

Vawiina Primary School  Zirtirtute hena Tablet semna inkhawm hi Pi K. Lalsiamliani, DPC, Samagra Shiksha, Lawngtlai District chuan kaihruaiin, Pu H. Lalmuanpuia, APO, chuan Tablet hman dan tur tlangpui (user guidelines) sawifiahna a nei a; Pu Alex Lalzawmpuia, Dy. DPC, Samagra Shiksha, Lawngtlai District chuan kalkhawmte hnena lawmthu sawina neiin hun a khar.