1899/2024-2025

Khawzawl, dated 4th September, 2024: Panchayati Raj Institution (PRI) leh Community Based Organization (CBO) thawktute tana programme buatsaih, District Level Convergence on PRI CBO Convergence Project, DC Office, Khawzawl leh BMMU, MzSRLM, Khawzawl RD Block tangkawpin an buatsaih chu vawiin dar 10:30 am khan DC Conference Hall, Khawzawlah huaihawt a ni a, Khawzawl Deputy Commissioner, Pu K. Vanlalthiana chuan hun hman puiin Block Development Officer, Pu Timothy R. Lalhmangaiha chuan hun a kaihruai a ni.

DC Pu K. Vanlalthiana chuan he programme hi mipuiten hlawk taka sawrkar hmalakna an hman tangkai theih nana department thawhhona chungchanga inzirtirna pawimawh tak a nih thu a sawi a, PRI leh CBO thawktuten hlawk taka hun hmanga mipui tha zawka an tanpui theih nana an zir thar te hmang tangkai turin a fuih. Department aiawha lo kal zawng zawngte hnenah an hun hlu tak pe a an lo kal theih avangin lawmthu a sawi bawk a ni.

He hunah hian sawrkar department hrang hrang aiawh ten PowerPoint presentation pein an department kalhmang te, an hmalakna hrang hrang te leh thawhho theih dan hrang hrang te an tarlang a. Sawihona hun leh zawhna leh chhanna hun hawn a ni bawk.