Vawiin khan Transport Minister Pu John Rotluangliana chuan Lal Thanhawla Auditorium-ah Road Safety chungchanga hriattur pawimawhte inzirtirna leh sawihona Seminar, ‘ Road Safety- Time for Action’ tih thupui hmanga buatsaih chu a hawng . He Seminar ah hian Pi Tamali Ganguly, Consultant, Association of State Road Transport Undertakings (ASRTU), Ministry of Road Transport and Highways, line department hrang hrang hotute leh zirlai te an tel a ni.
Transport Minister chuan Mizoramah Road Safety chungchanga hmalakna a la reiloh thu sawiin, Central sawrkar in din tura a tih angin State Road Safety Council leh District Road Safety Council din a nih tawh thu a sawi a, Lead Agency hrang hrang - Transport, Police, H&FW, PWD leh Education Depts. te nen a tang hoin hna thawh ani dawn ani a ti. Pu John Rotluangliana chuan Mizoram chu tlangram chhengchhe tak, kawngpui te pawh chhuk chho tak tak leh kualtak anih thu sawiin, accident tamna chu kawng thatna lai ani tlangpui a, hei hian kan fimkhur tawkloh zia a tilang ani a ti. Road Safety chungchangah driver te chauh ni lovin kan zavaia kan pawimawh thu sawiin, mi tinte traffic dan leh dun te zawm hram hram turin a chah bawk a. Minister chuan sawrkarin Road Safety a ngaih pawimawh zia tarlangin, State Road Safety Policy Draft pawm anih tawh thute , he dan ah hian lirtheia chetsualna laka invenna leh vanduaina tawkte enkawlna tur chungchang tarlan ani ati. Kalkhawmte chu he Road Safety Seminar hi dan ang maia buatsaih ani lo tih hre thar tur leh kanram mipuite himna pawchhuak ngei thei tura buatsaih ani tih hria a, theihtawpchhuaha chhawr tangkai turin a chah nghal bawk a ni.
He hun rawn hmanpuitu Pi Tamali Ganguly, Consultant, ASRTU, Ministry of Road & Highways pawhin thu sawiin, kalkhawmte chu an kal chhan hrereng tur leh Road Safety chu kan zavaia mawhphurhna leh tan hona avang chauh a hlawhtling thei ani a ti. Hriatna chauh duhtawk mai lo a, a taka lantir nghal zel thin turin a chah a ni. Accident chu thihna chauh ni lovin chhungkaw tana channa nasa tak ani tih sawiin pumpelh tur chuan line department hrang hrang te leh mipuite kan thawh ho angai ani a ti.
Seminar hi Ministry of Road Transport & Highways (MoRTH), Association of State Road Transport Undertakings (ASRTU) leh Mizoram State Road Safety Council te bultuma buatsaih a ni a. He hunah hian line Department hrang hrang ten Presentation an nei a, hriattur tul ang te sawi hona leh zawhna chhanna hun te neih a ni.
