Project Pushpak chuan kum 50 an dinna Golden Jubilee an lawm dawn a. Hemi pual hian intlansiak na Golden Jubilee Run (5 km) February 25 ah ropui taka buatsaih tum a ni. Hemi chungchang lo thlir lawk na atan vawiin khan Secretary, Department of Sports and Youth Services office chamber ah meeting neih a ni.

Meeting hi Pu H.L. Rochungnunga IAS, Secretary, Sports and Youth Services in a kaihruai a, Project Pushpak chu Mizoram tan an pawimawh zia thu sawiin, Golden Jubliee Run chu sawrkar in a ngaihlu a, hlawhtling taka neih a nih ngei theih na atan sawrkar in theihtawp a chhuah dawn a ni a ti.

Golden Jubilee Run (5 km) hi 25th February ah neih a ni dawn a, dar 6:00 am ah Aizawl AR Lammual ah participants an kal khawm anga, dar 7:00 am ah tlan tur te hi vailiam an ni ang. Intlansiak na tur kawng hi AR Lammual – Raj Bhawan – Sikulpuikawn Junction – Republic Road atangin Treasury Square ah lo chhuak in, AR Lammual ah bawk a tawp ang. Darkar khat chhunga zawh tur a duan niin, lawmman sem na hun dar 9:00 am ah neih zui a ni nghal bawk ang. Intlansiak a tel zawng chu category pali ah then hran an ni anga – kum 18 chung lam, kum 13 atanga kum 18 inkar, kum 13 hnuai lam leh Veterans (Military & Para-Military), category tin ah hian lawmman hetiang hian ruahman ani:

1st Prize – Rs. 3000/-

2nd Prize – Rs.2000/-

3rd Prize – Rs. 1000/-

Consolation Prize – Rs. 500/- (category tinah mi 2-3 hnenah)

Lawmman bakah hian intlansiak-na a tel zawng zawng te lukhum pek vek anni anga, refreshment buatsaih a ni bawk ang. Intlansiak vailiam tur hian Chief Minister emaw Sports & Youth Services Minister beisei an ni anga, lawmman sem tur hian Governor beisei a ni thung ang.

Meeting-ah hian Department of Sports and Youth Services hotute bakah School Education Department, Aizawl Traffic Police, Sainik Board, Information and Public Relations, Border Roads Task Force (Pushpak), leh National Service Scheme (NSS) aiawhte an tel a ni. Committee chuan Project Pushpak Golden Jubilee Run ah a tam thei ang ber mipui tel turin a sawm.