Chapchar Kut 2017 Working Committee chu nimin tlai khan an chairman Pu C. Lalzahngoa hovin a chenna In-ah an thukhawm a, Chapchar Kut hmandan tur kimchang an rel.

Chapchar Kut 2017 hi March 3 chawhma dar 11-ah Tumpui Field-ah hman a ni ang a, Kut Pa atan Pu Zodintluanga Minister, PHE etc. chu beisei a ni a. Kumin Chapchar Kut-ah hian Mizo hnam lam chi hrang hrang entir bakah zaithiam zai mawi tak tak ngaihthlak theih tura ruahman a ni a. Kut lawmna-ah hian kum 75 chin chunglam Kut chhimtur a kal te tan thutna a bika siamsak an ni ang a, mipa leh hmeichhia Kut chhimtu upa ber thlangin, lawmman siamsak an ni dawn a. Kut hmang tura kal naupang mipa leh hmeichhia ‘Hnam inchei’ a inchei nalh ber thlan chhuah an nih dawn bakah, kut nula thlanchhuah a ni bawk ang.

Handloom leh handicraft phochhuahna tur hmun siam tum a ni a, a duh apiang tana lei theih tura phochhuah a ni dawn a. Hei bakah hian Mizo thil hlu leh hlimthla hrang hrang phochhuahna ‘Archives’ a duh apiang tana tlawh theih turin siam tum a ni bawk.

Committee chuan Kut ropui taka hman a nih theih nan hmala tu tur hrang hrang te a ruat bawk a ni.