Transport Minister Pu P.C. Zoram Sangliana chu nimin (31.7.2012) a National Road Safety Council Meeting ah telin thusawitu mi tlemte zingah a tel a, Mizoram a Road Safety chungchang hmalakna hrang hrang a sawite chu State dangte pawhin an bengvar hle niin thu dawn a ni. Nasa zawka road safety kalpui a nih theih nan a hranpaa 'Road Safety Fund' Mizoramah siam tum a nih thu leh chumi atana 'seed money' tumsak tura a dilna pawh Central Minister hian tihsak a tum thu a sawi a ni. Hei bakah hian Minister hian Union Minister for Road Transport and Highway hnenah Mizoram harsatna a thlen a, MST bus in mipui mamawhna avanga kawng tha lo chung chunga bus a tlan tir thinna kawng kilkhawrte siamna tura sum leh paia puihna a dil chu Union Transport Minister hian tihpuitlin ngei a tum thu a lo hrilh bakah hmanraw changkang zawk hmanga driving school department in a neih mek tihchangtlunna tur leh bus terminal sak nana rawtna a thlente pawh rang taka lo bawhzui ngei a tum thu Central Minister hian alo hrilh a ni.

Heng bakah hian Minister hian a Department enkawlte pualin Ministry hrang hrang leh official pawimawhte a dawr kual bawk a, ram dangte nena Cultural Exchange hman a nih theih nan mi pawimawh te a dawr bawk. A mi dawrte zingah hian External Affairs Ministry official te leh Secretary to Chairperson UPA te an tel.