Vawiin chawhma dar 11.00 khan Tranport Minister Pu P.C. Zoramsangliana chuan Housing Development Financial Corporation (HDFC) Bank buatsaih-a 20.8.2011 thleng awh tur Car Loan Mela chu Bazar Bungkawn-a HDFC Bank, Aizawl Branch-ah a hawng.

Pu P.C. Zoramsangliana chuan, “Mizoram hi ram ralmuang  leh boruak thengthaw nuam tak a nih avangin Bank rintlak tak takin thuthmun an rawn bengbel zel a; hei hian nasa takin kan state chhunga sum che vel leh kan economy nasa takin a tithing duang a. Chuvang chuan Bank lem ni lo, Reserve Bank of India-in a pawmpui Bank rintlak leh mipui nawlpuiin kan chhawr theih tur Bank-te hi hei aia zau zawk hian Mizoram-ah inzar pharh se tih hi duhthusam a ni” a ti.

Transport Minister Pu P.C. Zoramsangliana chuan Mizoram-a Bank rintlak tam zawk an rawn luh theihna tur leh an rawn inkhuar belh zel theihna tura United Bank of India (UBI)  Board of Directors zinga pakhat a nih lai atanga thahnemngai taka a lo tlangaupui ve thin thu sawiin, Bank hmingtha leh rintlak a lo pung zel chu lawmawm a tih thu a sawi a. Chutih rual chuan Minister chuan “Mizoram-a Bank thenkhatte erawh hi chuan sumdawng an nih in hrechang lova anmahni dawrtute tana biak hrehawm leh induhsan ching an awm mek bawk a, sim daih atan a tha hle a ni. Kan hnathawhna hmun theuha kan mawhphurhna hi inlulinna atan ni lova Kristian nunze mawi lanchhuah tirna remchang atan leh ram leh hnam rawngbawlna a ni tih kan hriat thar a tul zawk a ni” a ti. HDFC Bank-in Mizoram-a an hotu atan leh officer dang atana Mizo nula-tlangval thahnem tak an chhawr chu fakawm a tih thu sawiin, “Hei hian Mizo mipuite tan tlangnelna boruak a siam a, Bank mamawhtute tan dawr a tisamkhai lehzual a ni. “ a ti.

HDFC Bank hi Mizoram-ah Janruary 5, 2010 atang khan Aizawl-ah Branch neiin an inhawng tan a; tunah hian Saiha, Lunglei leh Champhai-ah Branch din belh a ni tawh a ni. Kuminah hian Kolasib leh Serchhi-ah branch thar hawn a ni dawn a; hei bakah hian Aizawl leh Lawngtlai-ah te pawh branch din belh tura ruahman mek a ni. Car Loan Mela chhung hian Car leh lirthei te chi hrang hrang atan sawrkar hnathawkte leh mimalte hnenah loan an pe chhuak dawn a; loan hi kum 2 leh kum 5 chhunga rulh tlak theih chite a ni.