Transport Minister Pu PC.Zoram Sangliana chuan, ‘Sawrkarin kawng tinrenga Zoram mipuite hmasawn nan tha a thlah ngai lova,kan sawrkar hian inthlan dawna kan thutiam hre rengin kan ti ang kan tih chu kan hlen mek zel a ni’, a ti.

He thu hi vawiin khan Bairabi-ah RMSA Building Rs 34,24,630/- senga sak  a hawnna ah a sawi a. Kolasib bial chhungah hian hmasawnna tamtak hmuh theihin kan tawng tawh a. Kan ti ang tia kan intiam ti thei tura chakna min petu Pathian chungah lawmthu ka sawi a ni, a ti a ni.

Pu Ramsanga chuan nimin atang khan a bial chhung khaw hrang hrang Kolasib, Pangbalkawn, Meidum leh Bairabi te a tlawh a. Hengah te hian thu sawiin, Chief Minister hova hmalakna  kawng hrang hrang te leh NLUP hmanga an hmalakna chu Party thenkhat ten an sawi hnawm viau laiin, mithiam leh mifing apiang-in tha an tih thu leh India ram mai nilo khawvel huap thleng pawha NLUP chu miten an fak thu a sawi a. Hmasawnna kawngah Mizoram chu Tripura hma a tlan thin ni mahseCongress sorkar loh chhung in Mizoram hma ah an awm tawh a ni a ti a. Eirawngbawlna gas pawh a bial chhung ah leh Saitual ah te company in thahnem tak an hmu chhuak a, heng te hi kawt kaia gas put ngailo in in chhung ah reilote ah herhchhuah  theih a ni dawn a ni a ti a ni.

Pu Ramsanga chuan  PHE Deptt. hnuaia Bairabi water supply scheme  hna kal mek chu a hmunah a tlawh bawk a.Hei hi kumin 2013 November a zawh hman tura hna kalpui mek a niin Gravity hmanga tlang tui lak a ni a. Za –a 85 thawh zawh tawh a ni tih PHE hotute chuan Minister hi an hrilh a. He Scheme hi NLCPR pawisa  490.47 lakhs sengasiamtur niin 80% sum dawn tawh a ni. Thawh zawh a nih hun chuan Bairabi khaw pum tui thianghlimin a chawm thei dawn a, kum sawmthum chhung chu  chawm thei tur a duan a ni. Pu Ramsanga chuan PHE hnathawh fakin an sawrkar chuan tui thianghlim lak hi a ngai pawimawh hle tih a sawi a. Kolasib District chhung Bairabi leh Bilkhawthlira Water scheme te peih tep a ni chu a lawmawm hle a ti a. Meidum khaw tui lakna tur pawh Central-ah DPR a thehluh dawn thu a sawi a ni.

Bairabi Khawtlang hruaitu te hnen ah Tui tla chharna atana hmanturinSpeed boat leina tur cheng singruk a hlan a, Bairabi zophai a Waiting shed sak na tur a hlan bawk a ni.